ଚଣ୍ଡିଗଡ଼: ନୂଆଦିଲ୍ଲୀ ସ୍ଥିତ ଇନ୍ଦିରା ଗାନ୍ଧୀ ଇନଡୋର ଷ୍ଟାଡିୟମ୍ରେ ଜାରି ରହିଥିବା ବିଶ୍ବ ମହିଳା ବକ୍ସିଂ ଚାମ୍ପିୟନସିପରେ ସ୍ବର୍ଣ୍ଣ ପଦକ ଜିତିଲେ ହରିୟାଣାର ନୀତୁ ଘନଘସ । ୪୮ କିଲୋ ଭାର ବର୍ଗରେ ମଙ୍ଗୋଲିଆ ବକ୍ସର ଲୁଟସେଖାନଙ୍କୁ ୫-୦ରେ ପରାସ୍ତ କରି ଏହି ସ୍ବର୍ଣ୍ଣ ପଦକ ହାସଲ କରିଛନ୍ତି ହରିୟାଣାର ମହିଳା ବକ୍ସର ନୀତୁ ଘନଘସ । ସେ ଏହା ପୂର୍ବରୁ କାଜିକିସ୍ତାନର ବକ୍ସରଙ୍କୁ ୫-୨ ବ୍ୟବଧାନରେ ପରାସ୍ତ କରି ଫାଇନାଲରେ ପ୍ରବେଶ କରିଥିଲେ । ତେବେ ନୀତୁଙ୍କୁ ଫାଇନାଲ ମ୍ୟାଚ୍ରେ ଉତ୍ସାହିତ କରିବା ପାଇଁ ତାଙ୍କର ପ୍ରଶିକ୍ଷକ ତଥା ଦ୍ରୋଣାଚାର୍ଯ୍ୟ ପୁରସ୍କାର ପ୍ରାପ୍ତ ଜଗଦୀଶ ସିଂହଙ୍କ ସମେତ ନୀତୁଙ୍କ ବାପା ଓ ପରିବାରର ସଦସ୍ୟ ମ୍ୟାଚ୍ରେ ଉପସ୍ଥିତ ଥିଲେ ।
ତେବେ ସ୍ବର୍ଣ୍ଣ ପଦକ ବିଜୟୀ ବକ୍ସର ନୀତୁ ଘନଘସଙ୍କ ବାପା ଜୟ ଭଗବାନ ହରିୟାଣା ବିଧାନସଭାର ଜଣେ କର୍ମଚାରୀ ଅଟନ୍ତି । ନୀତୁ ୨୦୧୨ ମସିହାରେ ପ୍ରଥମ ଥର ପାଇଁ ଭିୱାନୀରେ ପ୍ରଶିକ୍ଷକ ଜଗଦୀଶ ସିଂହଙ୍କ ନିକଟରୁ ତାଲିମ ନେବା ଆରମ୍ଭ କରିଥିଲେ । ଏହାପର ଠାରୁ ସେ ନିରନ୍ତର ପରିଶ୍ରମ କରିଆସୁଥିଲେ । ଯେଉଁ କାରଣରୁ ସେ ଏହି ସଫଳତା ପାଇଥିବା ତାଙ୍କ ବାପା ପ୍ରକାଶ କରିଛନ୍ତି । ନୀତୁ ଏବେ ଚୌଧୁରୀ ବଂଶୀଲାଲ ବିଶ୍ବ ବିଦ୍ୟାଳୟରେ ଶାରୀରିକ ଶିକ୍ଷା ବିଭାଗରେ (Masters in Physical Education) ଅଧ୍ୟୟନ କରୁଛନ୍ତି । ତାଙ୍କ ସାନ ଭାଇ ଅକ୍ଷିତ କୁମାର ବନ୍ଧୁକ ଚାଳନା ଖେଳାଳି ଅଟନ୍ତି । ସେ ନିକଟରେ ଜାତୀୟସ୍ତରୀୟ ବନ୍ଧୁକ ଚାଳନା ପ୍ରତିଯୋଗିତାରେ ଭାଗ ନେଇଥିଲେ । ତେବେ ନୀତୁ ପୂର୍ବରୁ ମଧ୍ୟ ଅନ୍ତର୍ଜାତୀୟସ୍ତରରେ ଅନେକ ପଦକ ଜିତିଛନ୍ତି । ଏବେ ବିଶ୍ବ ଚାମ୍ପିୟନସିପରେ ମଧ୍ୟ ସ୍ବର୍ଣ୍ଣ ପଦକ ଜିତି ଦେଶର ନାମ ଉଜ୍ବଳ କରିଛନ୍ତି ବୋଲି ତାଙ୍କ ସାନ ଭାଇ ପ୍ରକାଶ କରିଛନ୍ତି ।