ଭୁବନେଶ୍ବର: 17 ବର୍ଷରୁ କମ ମହିଳା ଫିଫା ବିଶ୍ବକପରେ ଭାରତର ଅଭିଯାନ ଶେଷ ହୋଇଛି । ବିଶ୍ବକପରେ ଲଗାତାର 3ଟି ଯାକ ମ୍ୟାଚ ହାରି ଭାରତ ତାର ଅଭିଯାନ ଶେଷ କରିଛି । ପ୍ରଥମ ମୁକାବିଲାରେ ଆମେରିକା, ଦ୍ବିତୀୟ ମୁକାବିଲାରେ ମରକ୍କୋ ଓ ତୃତୀୟ ତଥା ଶେଷ ମୁକାବିଲାରେ ବ୍ରାଜିଲଠୁ 5-0ରେ ପରାସ୍ତ ହୋଇ ଗ୍ରୁପ ପର୍ଯ୍ୟାୟରୁ ଭାରତ ଅଭିଯାନ ଶେଷ କରିଛି । ବିଜୟ ନ ହେଲା ନାହିଁ କୌଣସି ମ୍ୟାଚରେ ଗୋଟିଏ ବି ଗୋଲ କରିବାରେ ସଫଳ ହୋଇନଥିଲା ଆୟୋଜକ ଦଳ ।
କଳିଙ୍ଗ ଷ୍ଟାଡିୟମରେ ଅନ୍ତିମ ମ୍ୟାଚରେ ବ୍ରାଜିଲ ଓ ଭାରତ ମଧ୍ୟରେ ମୁକାବିଲା ହୋଇଥିଲା । ଏଥିରେ ବ୍ରାଜିଲ 5ଟି ଗୋଲ୍ ଦେଇ ଏକତରଫା ବିଜୟ ହାସଲ କରିଥିଲା । ମ୍ୟାଚରେ ଜର୍ସି ପରିବର୍ତ୍ତନ ହୋଇଥିଲା । ଜର୍ସି ବଦଳିଥିଲା ହେଲେ ଭାରତର ଭାଗ୍ୟ ବଦଳିନଥିଲା । ପ୍ରଥମ ଦୁଇଟି ମ୍ୟାଚ ପରି ତୃତୀୟ ମ୍ୟାଚରେ ମଧ୍ୟ ପରାଜିତ ହୋଇଛି । ଆରମ୍ଭରୁ ବ୍ରାଜିଲ ଆଧିପତ୍ୟ ବିସ୍ତାର କରିଥିଲା । ଭାରତ ଯେତେ ଚେଷ୍ଟା କରିଥିଲେ ବି ଖାତା ଖୋଲି ପାରିନଥିଲା । ବ୍ରାଜିଲ ଖେଳାଳି ଭାରତୀୟ ଗୋଲପୋଷ୍ଟ ଉପରେ ଲଗାତାର ଆଟାକ କରିଥିଲେ । 11 ତମ ମିନିଟରେ ଆଲିନେଙ୍କଠାରୁ ପାସ୍ ପାଇଥିବା ଗାଦି ବେର୍ଚୋନ ବଲରୁ ନିୟନ୍ତ୍ରଣକୁ ଆଣି ଗୋଲ ଦେବା ଆରମ୍ଭ କରିଥିଲେ ।
34ତମ ମିନିଟରେ କାଜଲଙ୍କ ହ୍ୟାଣ୍ଡବଲ ଯୋଗୁ ଫ୍ରି-କିଜ ପାଇଥିଲା ବ୍ରାଜିଲ । ମାତ୍ର ଗାବ୍ରିଏଲ ବୋର୍ଚୋନଙ୍କୁ ରାଇଟ ଫୁଟ ସଟ ଗୋଲପୋଷ୍ଟ ବାହାରେ ଚାଲି ଯାଇଥିଲା । ବ୍ରାଜିଲ ଆକ୍ରମଣ ପ୍ରକ୍ରିୟା ଜାରି ରହିଥିଲା । 40 ତମ ମିନିଟରେ ଆନା ଫ୍ଲାରିଆଙ୍କୁ ପାସକୁ ଗୋଲରେ ପରିଣତ କରିଥିଲେ ଆଲିନେ । ପ୍ରଥମାର୍ଦ୍ଧରେ ଶେଷ ସୁଦ୍ଧା ବ୍ରାଜିଲ 2-0ଗୋଲରେ ଆଗୁଆ ରହିଥିଲା । ଦ୍ବିତୀୟାର୍ଦ୍ଧରେ ଭାରତର ପ୍ରଦର୍ଶନରେ ପରିବର୍ତ୍ତନ ଆସିନଥିଲା । ଦ୍ବିତୀୟାର୍ଦ୍ଧରେ 6 ମିନିଟ ପରେ ବ୍ରାଜିଲ ପକ୍ଷରୁ ଆଲିନେ ବ୍ୟକ୍ତିଗତ 3ଟି ଗୋଲ୍ କରିଥିଲେ । ମ୍ୟାଚର ଶେଷ ସୁଦ୍ଧା ବ୍ରାଜିଲ 5ଟି ଗୋଲ କରିଥିବାବେଳେ ଭାରତ 0ରେ ରହିଥିଲା । ଆମେରିକା ଓ ମରକ୍କୋଠୁ ହାରିବା ପରେ ଭାରତ କ୍ବାର୍ଟର ଦୌଡରୁ ବାଦ ପଡିଥିଲା ।