ପୁନେ(ମହାରାଷ୍ଟ୍ର): ଚଳିତ ଅଲଟିମେଟ ଖୋ ଖୋ ଟୁର୍ଣ୍ଣାମେଣ୍ଟରେ ଓଡିଶା ଜଗର୍ନଟ୍ସ ଟିମର ଦମଦାର ପ୍ରଦର୍ଶନ ଜାରି ରହିଛି । ଓଡିଶା କ୍ରୀଡା ଓ ଯୁବସେବା ବିଭାଗ ମନ୍ତ୍ରୀ ତୁଷାରକାନ୍ତି ବେହେରା ଟିମ ଓଡିଶାର ଜବରଦସ୍ତ ପ୍ରଦର୍ଶନକୁ ପ୍ରଶଂସା କରିଛନ୍ତି(Sports Minister Tusharkanti Behera praises Odisha Juggernauts) । ଚଳିତ ଥର ଅଲଟିମେଟ ଖୋ ଖୋ ଟୁର୍ଣ୍ଣାମେଣ୍ଟର(Ultimate Kho Kho) ଉଦ୍ଘାଟନୀ ସଂସ୍କରଣ(Inaugural Edition) ହୋଇଥିବାବେଳେ ଓଡିଶା ଜଗର୍ନଟ୍ସ ପ୍ରତିପକ୍ଷଙ୍କୁ ମାତ୍ ଦେଇ ବିଜୟ ଯାତ୍ରା ଜାରି ରଖିଛି ।
ଚଳିତ ସଂସ୍କରଣରେ ଓଡିଶା ଜଗର୍ନଟ୍ସ ୧୫ ପଏଣ୍ଟ ସହ ପଏଣ୍ଟ ଟେବୁଲର ଶୀର୍ଷରେ ମଧ୍ୟ ରହିଛି । ଏଥିସହ ଲଗାତାର ୪ଟି ମ୍ୟାଚ୍ରେ ଅପରାଜେୟ ରହିଛି । ଟିମର ଏହି ବିଜୟୀ ପ୍ରଦର୍ଶନରେ ଉତ୍ସାହିତ ହେବା ସହ ମନ୍ତ୍ରୀ ତୁଷାରକାନ୍ତି ସମସ୍ତ ଖେଳାଳିଙ୍କୁ ଅବଶିଷ୍ଟ ମ୍ୟାଚ୍ରେ ମଧ୍ୟ ବିଜୟୀ ପ୍ରଦର୍ଶନ ପାଇଁ ଶୁଭେଚ୍ଛା ଜଣାଇଛନ୍ତି । କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା କହିଛନ୍ତି, "ଆମର ଟିମ ଓଡିଶା ଜଗର୍ନଟ୍ସ ପଏଣ୍ଟ ଟେବୁଲର ଶୀର୍ଷରେ ରହିଥିବା ଜାଣି ଖୁସି । ଏଯାବତ ୬ଟି ମ୍ୟାଚ୍ରୁ ୫ଟିରେ ଆମଟିମ ବିଜୟୀ ହୋଇଛି । ଆମ ଟିମ ଫାଇନାଲରେ ପହଞ୍ଚିବା ନେଇ ମୁଁ ଦୃଢ ଆଶାବାଦୀ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ପୋର୍ଟ୍ସ ଫର୍ ୟୁଥ୍, ୟୁଥ୍ ଫର୍ ଫ୍ୟୁଚର୍ ଲକ୍ଷ୍ୟ ଓଡିଶାକୁ କ୍ରୀଡାର ଏକ ହବ୍ କରିପାରିଛି ।"
ମନ୍ତ୍ରୀ ଆହୁରି ମଧ୍ୟ କହିଛନ୍ତି, "ରାଜ୍ୟରେ ତୃଣମୂଳ ସ୍ତରରେ ସମସ୍ତ ଖେଳର ଭିତ୍ତିଭୂମୀର ବିକାଶ ଉପରେ ଆମେ ବିଶେଷ ଧ୍ୟାନ ଦେଉଛୁ, ଓଡିଶା ଜଗର୍ନଟ୍ସ ଖୋ ଖୋ ଖେଳର ଉନ୍ନତି ଦିଗରେ ଅନେକ ଯୁବ ପ୍ରତିଭାବାନ ଖେଳାଳିଙ୍କୁ ପ୍ରେରିତ କରିବ ବୋଲି ଆଶାବାଦୀ । ଏଥିସହ ଏହି ଅଲଟିମେଟ ଖୋ ଖୋ ଟୁର୍ଣ୍ଣାମେଣ୍ଟ ଅନେକ ଖୋ ଖୋ ଖେଳାଳିଙ୍କ ଜୀବନ ବଦଳାଇବାରେ ସହାୟକ ହେବ ।" ଓଡିଶା ଜଗର୍ନଟ୍ସ ଚଳିତ ଲିଗ୍ରେ ସର୍ବାଧିକ ଡିଫେଣ୍ଡିଂ ପଏଣ୍ଟ ୪୨ ହାସଲ କରିଛି । ସୁଭାଶିଷ ସନ୍ତ୍ରା ଓଡିଶା ଜଗର୍ନଟ୍ସ ଟିମ ପାଇଁ ଟ୍ରମ୍ପକାର୍ଡ ସାବ୍ୟସ୍ତ ହୋଇଛନ୍ତି । ସେ ମଧ୍ୟ ୪୩ ପଏଣ୍ଟ ସହ ଲିଗ୍ରେ ଟପ୍-୩ ୱାଜାର୍ସଙ୍କ(Top-3 Wazirs) ମଧ୍ୟରେ ରହିଛନ୍ତି ।