କଟକ:ରବିବାରଠାରୁ ଜବାହରଲାଲ ନେହେରୁ ଇନଡ଼ୋର ଷ୍ଟାଡ଼ିୟମରେ ଆରମ୍ଭ ହୋଇଛି ଅଲ୍ଟିମେଟ୍ ଖୋ ଖୋ ଦ୍ବିତୀୟ ସଂସ୍କରଣ । ଡିଫେଣ୍ଡିଂ ଚମ୍ପିଆନ ଓଡ଼ିଶା ଜଗରନଟ୍ସ ଓ ରାଜସ୍ଥାନ ୱାରିୟର୍ସ ମଧ୍ୟରେ ଉଦଘାଟନୀ ମ୍ୟାଚ ଖେଳାଯାଇଥିଲା । ଦୁଇ ଟିମ ମଧ୍ୟରେ କଡ଼ା ପ୍ରତିଦ୍ବନ୍ଦିତା ଦେଖିବାକୁ ମିଳିଥିଲା । ୱାରିୟର୍ସକକୁ ହରାଇ ଜଗରନଟ୍ସ ବିଜୟୀ ହୋଇଛି । ଏହି ମ୍ୟାଚରେ ଅକ୍ଷୟ ମସାଲ ସର୍ବାଧିକ ୮ ପଏଣ୍ଟ ସ୍କୋର୍ କରି ଓଡିଶା ଜଗରନଟ୍ସକୁ ବିଜୟ ଦ୍ବାରରେ ପହଞ୍ଚାଇଥିଲେ । ରନିଂ ଓ ଚେଜିଂରେ ଓଡିଶା ଦଳର ଭଲ ପ୍ରଦର୍ଶନ କରିଥିଲା । ରୋହନ ସିଙ୍ଗାଡ଼େ, ଅବିନାଶ ଦେଶାଇ ଓ ଗୌତମ ଏମକେ ୪ ମିନିଟରୁ ଅଧିକ ସମୟ ମ୍ୟାଚରେ ରହି ସିଜିନର ପ୍ରଥମ ବିଜୟ ହାସଲ କରିଥିଲେ ।
ବିଜୟ ହେବା ଲକ୍ଷ୍ୟରେ ମୈଦାନକୁ ଓହ୍ଲାଇଥିଲେ ଦୁଇ ଦଳ । ଟସ୍ ଜିତି ପ୍ରଥମେ ରନିଂ ନିଷ୍ପତି ନେଇଥିଲା ରାଜସ୍ଥାନ । ପ୍ରଥମ ଇନିଂସରେ ରନିଂ ଓ ଚେଜିଂରେ ଓଡିଶା ଦଳ ଚମତ୍କାର ପ୍ରଦର୍ଶନ କରି 19-10 ବ୍ୟବଧାନରେ ଆଗରେ ରହିଥିଲା । ଏହାପରେ ଦ୍ବିତୀୟ ଇନିଂସରେ 28 ମନିଟରେ 35-27 ବ୍ୟବଧାନରେ ରାଜସ୍ଥାନଠାରୁ ଆଗରେ ରହି ବିଜୟୀ ହୋଇଥିଲା ଓଡିଶା ଜଗରନଟ୍ସ ।
ଉଦଘାଟନୀ ମ୍ୟାଚରେ ରାଜ୍ୟ କ୍ରୀଡ଼ା ମନ୍ତ୍ରୀ ତୁଷାରକାନ୍ତି ବେହେରା, ସୁଧାଂଶୁ ମିତ୍ତଲ, ଅଧ୍ୟକ୍ଷ, ଖୋ ଖୋ ଫେଡ଼େରେଶନ ଅଫ୍ ଇଣ୍ଡିଆ ପ୍ରମୁଖ ଯୋଗ ଦେଇଥିଲେ। ତେବେ ଏହ ପ୍ରତିଯୋଗିତା ରବିବାରଠୁ ଆରମ୍ଭ ହୋଇଥିବା ବେଳେ ଆସନ୍ତା ଜାନୁଆରୀ 13 ପର୍ଯ୍ୟନ୍ତ ଚାଲିବ । ରାଜ୍ୟ ସରକାର ମେଗା କ୍ରୀଡା ଆୟୋଜନରେ ଦେଶ ବ୍ୟାପି ଏକ ମାଇଲଷ୍ଟୋନ ତିଆରି କରିଥିବା ବେଳେ ଆଗମୀ ଦିନରେ ଓଡ଼ିଶାରେ ଖୋ' ଖୋ' କ୍ରୀଡ଼ାର ବ୍ୟାପକ ପ୍ରସାର କରିବା ପାଇଁ ତୃଣମୂଳ ସ୍ତରରେ ଅନେକ ଯୋଜନାମାନ ହାତକୁ ନିଆଯିବ ବୋଲି କହିଛନ୍ତି କ୍ରୀଡ଼ାମନ୍ତ୍ରୀ ।