ନୂଆଦିଲ୍ଲୀ: ସେପ୍ଟେମ୍ବର ପହିଲାରୁ ସୋନିପତରେ ଆରମ୍ଭ ହେବାକୁ ଯାଉଛି ଜାତୀୟ କୁସ୍ତି ଶିବିର । ମହାମାରୀ କୋରୋନା ଭାଇରସ ସଂକ୍ରମଣ ସମୟ କୁସ୍ତିଯୋଦ୍ଧା ନରସିଂହ ଯାଦବଙ୍କ ପାଇଁ ବରଦାନ ସାବ୍ୟସ୍ତ ହୋଇଛି । ଅଲମ୍ପିକ୍ସରେ ଭାରତର ପ୍ରତିନିଧିତ୍ବ କରିବାକୁ ନରସିଂହଙ୍କୁ ଆଉଏକ ସୁଯୋଗ ମିଳିଛି ।
ଡୋପ ଟେଷ୍ଟରେ ବିଫଳ ହେବାପରେ ବାସନ୍ଦ ହୋଇଥିଲେ ନରସିଂହ । ଯାହା ଜୁଲାଇରେ ଶେଷ ହୋଇଛି । ଟୋକିଓ ଅଲମ୍ପିକ୍ସ ଚଳିତ ବର୍ଷ ଜୁଲାଇ 24ରୁ ଆରମ୍ଭ ହେବାନେଇ ସୂଚୀ ରହିଥିଲା । ମାତ୍ର ମହାମାରୀ କୋରୋନା ଭାଇରସ ଯୋଗୁଁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଛି । ଚଳିତ ବର୍ଷ ଅଲମ୍ପିକ୍ସ ଗେମ୍ସ ହୋଇଥିଲେ, 31ବର୍ଷୀୟ ମୁମ୍ବାଇ କୁସ୍ତିଯୋଦ୍ଧା ନରସିଂହଙ୍କୁ ପରବର୍ତ୍ତୀ ଅଲମ୍ପିକ୍ସ ପାଇଁ ଆଉ 4 ବର୍ଷ ଅପେକ୍ଷା କରିବାକୁ ହୋଇଥାନ୍ତା ।
ଆଗାମୀ ମାସରୁ ଆରମ୍ଭ ହେବାକୁ ଯାଉଥିବା ଜାତୀୟ ଶିବିର ପାଇଁ ନରସିଂହଙ୍କୁ ଗ୍ରୀନ ସିଗନାଲ ମିଳିଛି । କମିଟି ପକ୍ଷରୁ ଅନୁମତି ମିଳିବା ପରେ ନରସିଂହ ଅଭ୍ୟାସ ଆରମ୍ଭ କରିପାରିବେ ବୋଲି କହିଛନ୍ତି, ଭାରତୀୟ କୁସ୍ତି ଫେଡେରେସନ(WFI) ସହକାରୀ ସମ୍ପାଦକ ବିନୋଦ ତୋମାର ।