Asian games: ଏସୀୟ କ୍ରୀଡାରେ ଭାଗ ନେବେ ଭାରତୀୟ ଫୁଟବଲ ଦଳ, ଅନୁମତି ଦେଲା କ୍ରୀଡା ମନ୍ତ୍ରଣାଳୟ

ଭାରତୀୟ ପୁରୁଷ ଓ ମହିଳା ଫୁଟବଲ ଦଳ ପାଇଁ ଖୁସି ଖବର । ଏସୀୟ କ୍ରୀଡାରେ ଉଭୟ ପୁରୁଷ ଓ ମହିଳା ଦଳକୁ ଭାଗ ନେବାକୁ ଅନୁମତି ପ୍ରଦାନ କରିଛି କେନ୍ଦ୍ର କ୍ରୀଡା ମନ୍ତ୍ରଣାଳୟ । ଅଧିକ ପଢନ୍ତୁ

ନୂଆଦିଲ୍ଲୀ: ଫୁଟବଲ ପ୍ରେମୀଙ୍କ ପାଇଁ ଖୁସି ଖବର । ଏସୀୟ କ୍ରୀଡାରେ ଭାଗ ନେବେ ଭାରତୀୟ ଫୁଟବଲ ଦଳ । ଚଳିତ ବର୍ଷ ଚୀନରେ ହେବାକୁ ଥିବା ଏସୀୟ କ୍ରୀଡାରେ ଉଭୟ ପୁରୁଷ ଓ ମହିଳା ଭାରତୀୟ ଫୁଟବଲ ଦଳ ଭାଗ ନେବେ । ଶେଷରେ କ୍ରୀଡା ମନ୍ତ୍ରଣାଳୟ ଭାରତୀୟ ଫୁଟବଲ ଦଳକୁ ଏସୀୟ କ୍ରୀଡାରେ ଭାଗ ନେବାକୁ ଅନୁମତି ଦେଇଛି । ଏନେଇ ଟ୍ବିଟ କରି ସୂଚନା ଦେଇଛନ୍ତି କେନ୍ଦ୍ର କ୍ରୀଡାମନ୍ତ୍ରୀ ଅନୁରାଗ ଠାକୁର ।

କେନ୍ଦ୍ର କ୍ରୀଡାମନ୍ତ୍ରୀ ଅନୁରାଗ ଠାକୁର କହିଛନ୍ତି, ‘‘ଫୁଟବଲ ପ୍ରେମୀଙ୍କ ପାଇଁ ଖୁସି ଖବର । ଉଭୟ ପୁରୁଷ ଓ ମହିଳା ଫୁଟବଲ ଦଳ ଚୀନର ହାଙ୍ଗଝୋରେ ହେବାକୁ ଥିବା ଏସୀୟ କ୍ରୀଡାରେ ଅଂଶ ଗ୍ରହଣ କରିପାରିବେ । ସେମାନଙ୍କ ଶେଷ ପ୍ରଦର୍ଶନକୁ ଆଧାର କରି ମନ୍ତ୍ରଣାଳୟ ପକ୍ଷରୁ ନିଷ୍ପତ୍ତି ହୋଇଛି । ମୁଁ ନିଶ୍ଚିନ୍ତ ଯେ ସେମାନେ ଏସୀୟ କ୍ରୀଡାରେ ଭଲ ପ୍ରଦର୍ଶନ କରି ଦେଶକୁ ଗର୍ବିତ କରିବେ ।’’

ପ୍ରଥମେ ଭାରତୀୟ ଅଲିମ୍ପକ ସଂଘ ଦୁର୍ବଳ ମାନ୍ୟତା ପାଇଁ ଫୁଟବଲ ଦଳକୁ ଏସୀୟ କ୍ରୀଡାରେ ଭାଗ ନେବାକୁ ଅନୁମତି ଦେଇନଥିଲା । ଭାରତୀୟ ଫୁଟବଲ ପ୍ରଶଂସକ, ଭାରତୀୟ ଦଳର କର୍ମକର୍ତ୍ତା ଏବଂ ସର୍ବଭାରତୀୟ ଫୁଟବଲ ସଂଘ ସଭାପତି (ଏଆଇଏଫଏଫ) କଲ୍ୟାଣ ଚୌବେ ଏସୀୟ କ୍ରୀଡା ପାଇଁ ଉଭୟ ପୁରୁଷ ଓ ମହିଳା ଦଳକୁ ଅନୁମତି ପ୍ରଦାନ କରିବାକୁ କ୍ରୀଡା ମନ୍ତ୍ରଣାଳୟକୁ ଦାବି ଜଣାଇଥିଲେ । ବିଚାର ବିମର୍ଶ ପରେ ଉଭୟ ଫୁଟବଲ ଦଳକୁ ଏସୀୟ କ୍ରୀଡାରେ ଭାଗ ନେବାକୁ ଅନୁମତି ପ୍ରଦାନ କରିଛି ।

ଶେଷ ଥର ପାଇଁ 2014ରେ ଏସୀୟ କ୍ରୀଡାରେ ଭାରତୀୟ 23 ବର୍ଷରୁ କମ ପୁରୁଷ ଫୁଟବଲ ଦଳ ଭାଗ ନେଇଥିଲେ । ଗ୍ରୁପ ପର୍ଯ୍ୟାୟରୁ ଦଳ ଅଭିଯାନ ଶେଷ କରିଥିଲା । 2018ରେ ଭାରତୀୟ ଫୁଟବଲ ଦଳକୁ ଅନୁମତି ମିଳିନଥିଲା । ଶେଷରେ 8 ବର୍ଷ ପରେ ଭାରତୀୟ ଫୁଟବଲ ଦଳ ଏସୀୟ କ୍ରୀଡାରେ ଭାଗ ନେବାକୁ ଯାଉଛି । ଫିଫା ମାନ୍ୟତାରେ ଭାରତୀୟ ପୁରୁଷ ଫୁଟବଲ ଦଳ 99ତମ ସ୍ଥାନରେ ରହିଥିବା ବେଳେ ମହିଳା ଦଳ 60ତମ ସ୍ଥାନରେ ରହିଛି । ନିକଟରେ ଭୁବନେଶ୍ବରରେ ଅନୁଷ୍ଠିତ ଇଣ୍ଟର କଣ୍ଟିନେଣ୍ଟାଲ କପ ଓ ସାଫ ଚମ୍ପିଆନସିପ ଟାଇଟଲ ହାତେଇଥିବା ଭାରତ ଏସୀୟ କ୍ରୀଡାରେ ଉନ୍ନତ ପ୍ରଦର୍ଶନ କରିବା ବୋଲି ଆଶା ରହିଛି । ଚଳିତ ବର୍ଷ 23 ବର୍ଷରୁ କମ ଦଳ ଏସୀୟ କ୍ରୀଡାରେ ଖେଳିବାର ନିୟମ ହୋଇଥିଲା । ପ୍ରତି ଦଳରେ କେବଳ 3 ଜଣ ବୟସାଧିକ ଖେଳାଳି ରହିପାରିବେ ।