ହାଇଦ୍ରାବାଦ: ଚଳିତ ସିଙ୍ଗାପୁର ଓପନରେ ଭାରତୀୟ ସଟଲର ସିନ୍ଧୁଙ୍କ ଦମଦାର ପ୍ରଦର୍ଶନ । ମହିଳା ସିଙ୍ଗଲ୍ସ ଫାଇନାଲରେ ଚୀନର ୱାଙ୍ଗ ଝି ୟିଙ୍କୁ ହରାଇ ସିଙ୍ଗାପୁର ଓପନ ଟାଇଟଲ ହାତେଇଛନ୍ତି ଭାରତର ଷ୍ଟାର ଖେଳାଳି ପିଭି ସିନ୍ଧୁ । ଚୀନ ପ୍ରତିଯୋଗୀ ୱାଙ୍ଗ ଝି ୟିଙ୍କୁ ୨୧-୯, ୧୧-୨୧ ଏବଂ ୨୧-୧୫ ସେଟରେ ହରାଇ ପ୍ରଥମ ଥର ପାଇଁ ସିଙ୍ଗାପୁର ଓପନ ଜିତିଛନ୍ତି ପିଭି ସିନ୍ଧୁ । ଏହା ତାଙ୍କ କ୍ୟାରିଅରର ୫୦୦ତମ ଟାଇଟଲ । ସାଇନା ନେହେୱାଲଙ୍କ ପରେ ପିଭି ସିନ୍ଧୁ ଦ୍ବିତୀୟ ଭାରତୀୟ ମହିଳା ଯିଏକି ସିଙ୍ଗାପୁର ଓପନ ଟାଇଟଲ ଜିତିଛନ୍ତି ।
୨୨ ବର୍ଷୀୟ ୱାଙ୍ଗ ଝି ୟି ଏସିଆନ ଚାମ୍ପିୟନସିପରେ ସ୍ବର୍ଣ୍ଣ ପଦକ ଜିତିଥିଲେ । ହେଲେ ସିଙ୍ଗାପୁର ଓପନରେ ତାଙ୍କର ରଣନୀତି କାମ କରିନଥିଲା । ସିନ୍ଧୁଙ୍କ ପାଇଁ ବିଶ୍ବର ନଂ ୧୧ର ମାନ୍ୟତା ୱାଙ୍ଗ ଝି ୟିଙ୍କୁ ପରାସ୍ତ କରିବା ସହଜ ନଥିଲା । ତିନି ସେଟ୍ ଧରି ଚାଲିଥିବା ମ୍ୟାଚରେ ସିନ୍ଧୁ ପ୍ରଥମେ ବିଜୟରୁ ଆରମ୍ଭ କରିଥିଲେ। ସେ ପ୍ରଥମ ସେଟରେ ଚାଇନାର ଖେଳାଳି ୱାଙ୍ଗଙ୍କୁ ୨୧-୯ରେ ପରାସ୍ତ କରିଥିଲେ। ଏହାପରେ ୱାଙ୍ଗ କମବ୍ୟାକ କରି ଦ୍ବିତୀୟ ସେଟ୍ ୨୧-୧୧ରେ ଜିତି ମ୍ୟାଚ୍କୁ ବରାବର ସ୍ଥିତିକୁ ଆଣିଥିଲେ । ତୃତୀୟ ସେଟ୍ ବେଶ୍ ରୋମାଞ୍ଚକର ଥିଲା। ପ୍ରାରମ୍ଭିକ ୮-୧୦ ପଏଣ୍ଟ ପର୍ଯ୍ୟନ୍ତ, ଦୁଇ ଖେଳାଳିଙ୍କ ମଧ୍ୟରେ ସମାନ ଲଢ଼େଇ ହୋଇଥିଲା । କିନ୍ତୁ ପିଭି ସିନ୍ଧୁ ଧୀରେ ଧୀରେ ମ୍ୟାଚ୍ରେ ଆଗକୁ ବଢ଼ିଥିଲେ ଏବଂ ତୃତୀୟ ସେଟକୁ ୨୧-୧୫ ବ୍ୟବଧାନରେ ଜିତି ଟାଇଟଲ ହାତେଇ ନେଇଛନ୍ତି । ସିନ୍ଧୁଙ୍କ ଏହି ସଫଳତା ଆଗାମୀ ଜୁଲାଇ ୨୮ରୁ ବମିଂହାମରେ ଆରମ୍ଭ ହେବାକୁ ଥିବା କମନୱେଲଥ ଗେମ୍ସରେ ଭାରତ ପାଇଁ ବୁଷ୍ଟ ଯୋଗାଇବ ।