ନୂଆଦିଲ୍ଲୀ:ଚଳିତ ଅନ୍ତର୍ଜାତୀୟ ସୁଟିଂ ସ୍ପୋର୍ଟ ଫେଡେରେସନ(ISSF) ଜୁନିଅର ବିଶ୍ବ ଚମ୍ପିଆନସିପ୍ରେ ଭାରତୀୟ ଷ୍ଟାର ସୁଟର ମନୁ ଭାକରଙ୍କ ଐତିହାସିକ ପ୍ରଦର୍ଶନ । ପେରୁର ଲିମାରେ ଚାଲିଥିବା ଏହି ମେଗା ଟୁର୍ଣ୍ଣାମେଣ୍ଟର ମହିଳା ୧୦ ମିଟର ଏୟାର ପିସ୍ତଲ ପ୍ରତିଯୋଗିତାରେ ଚମ୍ପିଆନ ହୋଇଛନ୍ତି ମନୁ । ଏଥିସହ ଜୁନିଅର ବିଶ୍ବ ଚମ୍ପିଆନ ତାଜ୍ ପିନ୍ଧିଛନ୍ତି ।
ପ୍ରତିଯୋଗିତାରେ ମନୁ ଦମଦାର ପ୍ରଦର୍ଶନ କରିଥିଲେ । ୨୪୧.୩ ପଏଣ୍ଟ ସ୍କୋର କରିବା ସହ ପ୍ରଥମ ସ୍ଥାନରେ ରହିଥିଲେ । ଦ୍ବିତୀୟ ସ୍ଥାନରେ ରହି ରୌପ୍ୟ ବିଜେତା ହୋଇଛନ୍ତି ଇଶା ସିଂ । ସେହିପରି ତୁର୍କୀର ୟାସେମିନ ୟିଲମାଜ ବ୍ରୋଞ୍ଜ ପଦକ ହାତେଇଥିଲେ ।
ଏହା ଚଳିତ ପ୍ରତିଯୋଗିତାରେ ଭାରତର ପ୍ରଥମ ସ୍ବର୍ଣ୍ଣ ପଦକ । ପୂର୍ବରୁ ୧୦ ମିଟର ଏୟାର ରାଇଫଲରେ ରୁଦ୍ରାକ୍ଷ ପାଟିଲ ରୌପ୍ୟ ଓ ମହିଳା ଏୟାର ରାଇଫଲରେ ରମିତା ବ୍ରୋଞ୍ଜ ପଦକ ଜିତିଥିଲେ ।