ନୂଆଦିଲ୍ଲୀ: ବ୍ୟାଡମିଣ୍ଟନ ଏସିଆ ଚାମ୍ପିଅନସିପରେ ଭାରତକୁ ସ୍ବର୍ଣ୍ଣିମ ସଫଳତା । ଡବଲ୍ସ ଚାମ୍ପିଅନ ହୋଇ ଇତିହାସ ରଚିଲେ ଭାରତୀୟ ସାତ୍ତ୍ବିକ-ଚିରାଗ ଯୋଡି । ଭାରତର ଅଭିଜ୍ଞ ଖେଳାଳି ସାତ୍ତ୍ବିକ ସାଇରାଜ ଓ ଚିରାଗ ସେଟ୍ଟୀ ଫାଇନାଲରେ ମାଲେସିଆ ଯୋଡିଙ୍କୁ ହରାଇ ସ୍ବର୍ଣ୍ଣ ପଦକ ଜିତିଛନ୍ତି । ମାଲେସିଆ ଯୋଡିଙ୍କୁ 16-21, 21-17, 21-19 ସେଟରେ ପରାସ୍ତ କରି 58 ବର୍ଷ ପରେ ଦେଶକୁ ସ୍ବର୍ଣ୍ଣ ପଦକ ଭେଟି ଦେଇଛନ୍ତି ସାତ୍ତ୍ବିକ-ଚିରାଗ । ଏହି ଯୋଡିଙ୍କ ସଫଳତା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟ୍ବିଟ କରି ଯୋଡିକୁ ଶୁଭେଚ୍ଛା ଜଣାଇଛନ୍ତି ।
ଦେଶର ପ୍ରଥମ ଡବଲ୍ସ ଯୋଡି ଭାବେ ଡବଲ୍ସ ଟାଇଟଲ ଜିତିଛନ୍ତି ସାତ୍ତ୍ବିକ-ଚିରାଗ । ପୁରୁଷ ଡବଲ୍ସ ଫାଇନାଲରେ ସାତ୍ତ୍ବିକ-ଚିରାଗ ଓ ମାଲେସିଆର ଓଙ୍ଗ ୟିଉ ସିନ ଓ ତେଓ ଇ ୟି ଯୋଡି ମୁହାଁମୁହିଁ ହୋଇଥିଲେ । କଡା ମୁକାବିଲାରେ ଭାରତୀୟ ଯୋଡି 16-21, 21-17, 21-19 ସେଟରେ ରୋମାଞ୍ଚକର ବିଜୟ ହାସଲ କରିଥିଲେ । ପ୍ରଥମ ଗେମରେ ମାଲେସିଆ ଯୋଡି ବିଜୟ ହାସଲ କରିଥିଲେ ମାତ୍ର ଭାରତୀୟ ଯୋଡି ଜବରଦସ୍ତ କମବ୍ୟାକ କରିଥିଲେ । ଅସଲ ଖେଳ ଦେଖାଇଥିଲେ ସାତ୍ତ୍ବିକ-ଚିରାଗ । ଦୁଇଟି ଯାକ ଗେମରେ ଲଢୁଆ ପ୍ରଦର୍ଶନ କରି ଐତିହାସିକ ବିଜୟ ହାସଲ କରିଛନ୍ତି ।
ସାତ୍ତ୍ବିକ-ଚିରାଗଙ୍କ ପୂର୍ବରୁ ଲକ୍ଷ୍ନୌରେ ଆୟୋଜିତ 1965 ସଂସ୍କରଣରେ ଦିନେଶ ଖାନା ଏକକ ବର୍ଗରେ ପ୍ରଥମ ସ୍ବର୍ଣ୍ଣ ପଦକ ହାସଲ କରିଥିଲେ । ଥାଇଲାଣ୍ଡର ସଙ୍ଗୋବଙ୍କୁ ଫାଇନାଲ ରାଉଣ୍ଡରେ ପରାସ୍ତ କରିଥିଲେ । ପୁରୁଷ ଡବଲ୍ସରେ ଭାରତ ପାଇଁ ଏହା ଦ୍ବିତୀୟ ପଦକ । 1971ରେ ଦୀପୁ ଘୋଷ ଓ ରମଣ ଘୋଷ ବ୍ରୋଞ୍ଜ ପଦକ ଜିତିଥିଲେ ।