ସମ୍ବଲପୁର: ପାରାଲମ୍ପିକ ସ୍ବର୍ଣ୍ଣ ପଦକ ବିଜେତା ପ୍ରମୋଦ ଭଗତଙ୍କୁ ସମ୍ବଲପୁରରେ ଭବ୍ୟ ସ୍ବାଗତ ସମ୍ବର୍ଦ୍ଧନା । ସମ୍ବଲପୁର ଗସ୍ତରେ ଆସିଥିବା ବେଳେ ସୁନାପୁଅ ପ୍ରମୋଦଙ୍କୁ ଜିଲ୍ଲାର ବିଭିନ୍ନ ଅନୁଷ୍ଠାନ ପକ୍ଷରୁ ବିପୁଳ ସ୍ବାଗତ ସମ୍ବର୍ଦ୍ଧନା କରାଯାଇଛି । ପ୍ରମୋଦ ସମ୍ବଲପୁରରେ ପହଞ୍ଚିବାପରେ ପ୍ରଥମେ ଜିଲ୍ଲାର ଅଧିଷ୍ଠାତ୍ରୀ ଦେବୀ ସମଲେଶ୍ବରୀଙ୍କ ମନ୍ଦିରକୁ ଯାଇ ପୂଜାର୍ଚ୍ଚନା ସହିତ ମା'ଙ୍କ ଆଶୀର୍ବାଦ ନେଇଥିଲେ ।
ସମ୍ବଲପୁରରେ ସୁନାପୁଅ ପ୍ରମୋଦ ଭଗତଙ୍କୁ ବ୍ୟାପକ ସମ୍ବର୍ଦ୍ଧନା
ପରେ ସମ୍ବଲପୁର ବ୍ୟାଡ୍ମିଣ୍ଟନ ଆସୋସିଏସନ ପକ୍ଷରୁ ପ୍ରମୋଦଙ୍କୁ ସ୍ବାଗତ କରିବା ପାଇଁ ସମଲେଶ୍ବରୀ ମନ୍ଦିରରୁ ଫାର୍ମ ରୋଡ଼, ମୁଦୀପଡା ଛକ, ଚର୍ଚ୍ଚ ଛକ, ଅଇଁଠାପାଲି ଛକ, ଲକ୍ଷ୍ମୀ ଟକିଜ ଛକ ଦେଇ ଏକ ବାଇକ ଶୋଭାଯାତ୍ରା ହୋଇଥିଲା । ପ୍ରମୋଦଙ୍କୁ ଖୋଲା ଜିପ୍ରେ ସହର ସାରା ବୁଲା ଯାଇଥିଲା। ଏହି ଅବସରରେ ଲକ୍ଷ୍ମୀ ଟକିଜ ଛକ ନିକଟରେ ସମ୍ବଲପୁର ଜିଲ୍ଲା ପୋଲିସ ପକ୍ଷରୁ ପ୍ରମୋଦଙ୍କୁ ସ୍ବତନ୍ତ୍ର ଭାବେ ସ୍ବାଗତ ସମ୍ବର୍ଦ୍ଧନା ଦିଆଯାଇଥିଲା ।