ଭୁବନେଶ୍ବର:ଜାପାନରେ ଚମକିଲେ ଓଡିଶାର ଷ୍ଟାର ସଟଲର ପ୍ରମୋଦ ଭଗତ । ଜାପାନ ପାରା ବ୍ୟାଡମିଣ୍ଟନ ପ୍ରତିଯୋଗିତାରେ ସ୍ବର୍ଣ୍ଣିମ ସଫଳତା ହାସଲ କରି ରାଜ୍ୟ ପାଇଁ ଗୌରବ ଆଣିଛନ୍ତି ଟୋକିଓ ପାରା ଅଲମ୍ପିକ୍ସ ସ୍ବର୍ଣ୍ଣ ବିଜେତା ପ୍ରମୋଦ । ପୁରୁଷ ସିଙ୍ଗଲ୍ସ ଏସଏଲ 3 ଫାଇନାଲ ମ୍ୟାଚରେ ପ୍ରମୋଦ ବାଜି ମାରି ସ୍ବର୍ଣ୍ଣ ପଦକ ହାସଲ କରିଛନ୍ତି । ଫାଇନାଲ ମୁକାବିଲାରେ ନିଜ ଦେଶର ମନୋଜ ସରକାରଙ୍କୁ 21-16, 21-19 ଗେମରେ ପରାସ୍ତ କରି ଗୋଲ୍ଡ ମେଡାଲ ଜିତିଛନ୍ତି । ସେହିପରି ପୁରୁଷ ଡବଲ୍ସ ଏସଏଲ 3-ଏସଏଲ4 ଫାଇନାଲରେ ରୌପ୍ୟ ପଦକ ଜିତିଛନ୍ତି ଦୀପ ରଞ୍ଜନ ବିଶୋଇ ।
ପୁରୁଷ ସିଙ୍ଗଲ୍ସ ଏସଏଲ 3 ଫାଇନାଲରେ ମନୋଜ ସରକାର ଓ ପ୍ରମୋଦଙ୍କ ମଧ୍ୟରେ ମୁକାବିଲା ହୋଇଥିଲା । ଦୁହିଁଙ୍କ ମଧ୍ୟରେ 38 ମିନିଟ ଧରି ମ୍ୟାଚ ଖେଳା ଯାଇଥିଲା । ଫାଇନାଲ ମ୍ୟାଚରେ ନିଜ ଦେଶର ମନୋଜ ସରକାରଙ୍କୁ 21-16, 21-19 ଗେମରେ ପରାସ୍ତ କରି ସ୍ବର୍ଣ୍ଣ ପଦକ ଜିତିଥିଲେ ପ୍ରମୋଦ ଭଗତ ।
ଅନ୍ୟପଟେ ପୁରୁଷ ଡବଲ୍ସରେ ଦୀପ ରଞ୍ଜନ ଓ ମନୋଜ ସରକାର ଯୋଡି ଫାଇନାଲରେ ପରାସ୍ତ ହୋଇ ରୌପ୍ୟରେ ସନ୍ତୁଷ୍ଟ ରହିଛନ୍ତି । ଏହି ଯୋଡି 19-21, 21-18, 17-21ରେ ନିହାଲ ଗୁପ୍ତା ଓ ନବୀନ ଶିବକୁମାରଙ୍କ ଠାରୁ ପରାସ୍ତ ହୋଇଥିଲେ । ଜାପାନ ପାରା ବ୍ୟାଡମିଣ୍ଟନରେ ଓଡିଶାରୁ ମୋଟ 4ଜଣ ଭାଗ ନେଇଥିଲେ । ସେମାନେ ହେଲେ ପ୍ରମୋଦ, ଦୀପ ରଞ୍ଜନ, ସୁଭ୍ରଜିତ ମହାରଣା ଓ ଦିଲେଶ୍ବର ରାଓ ।