ଭୁବନେଶ୍ବର: କ୍ରମାଗତ ଦ୍ବିତୀୟ ଥର ପାଇଁ ଓଡି଼ଶା ସରକାର ପୁରୁଷ ହକି ବିଶ୍ବକପ ଟୁର୍ଣ୍ଣାମେଣ୍ଟ ଆୟୋଜନ କରିବାକୁ ଯାଉଛି । ଆସନ୍ତାବର୍ଷ(୨୦୨୩) ଜାନୁଆରୀରେ ହେବାକୁ ଥିବା FIH ପୁରୁଷ ହକି ବିଶ୍ବକପ ଟୁର୍ଣ୍ଣାମେଣ୍ଟର ଆୟୋଜନ ପାଇଁ ଓଡି଼ଶା ସରକାର ପ୍ରାୟ ୧୧୦୦ କୋଟି ଟଙ୍କା ଖର୍ଚ୍ଚ କରୁଥିବା ଅନୁମାନ କରାଯାଉଛି । ଗତଥର ରାଜ୍ୟ ସରକାର ୨୦୧୮ରେ ହକି ବିଶ୍ବକପ ଆୟୋଜନ ପାଇଁ କେବଳ ୬୬.୭୮ କୋଟି ଟଙ୍କା ଖର୍ଚ୍ଚ କରିଥିଲେ, ମାତ୍ର ଏଥର ଖର୍ଚ୍ଚ ପରିମାଣ ପ୍ରାୟ ୧୬ ଗୁଣା ବୃଦ୍ଧି କରି ୧,୦୯୮.୪୦ କୋଟି କରିଛନ୍ତି ।
ବିର୍ସାମୁଣ୍ଡା ହକି ଷ୍ଟାଡିୟମ, ରାଉରକେଲା ୨୦୧୮ରେ ବିଶ୍ବକପର ସମସ୍ତ ମ୍ୟାଚ୍ ଭୁବନେଶ୍ବରର କଳିଙ୍ଗ ଷ୍ଟାଡିୟମରେ ଆୟୋଜନ କରାଯାଇଥିଲା । ମାତ୍ର ଚଳିତ ଥର ଭୁବନେଶ୍ବର ସହିତ ରାଉରକେଲାରେ ନବନିର୍ମିତ ବିର୍ସାମୁଣ୍ଡା ହକି ଷ୍ଟାଡିୟମରେ ମଧ୍ୟ ବିଶ୍ବକପ ମ୍ୟାଚ୍ ଖେଳାଯିବ । ଅଧିକାରିକ ସୂତ୍ର ଅନୁସାରେ, ମୋଟ ୧,୦୯୮.୪୦ କୋଟି ଟଙ୍କାରୁ ରାଉରକେଲା ସହରରେ ବିର୍ସାମୁଣ୍ଡା ହକି ଷ୍ଟାଡିୟମ ଓ ସଂଲଗ୍ନ କ୍ଷେତ୍ରର ବିକାଶ ପାଇଁ ରାଜ୍ୟ ୧,୦୧୦ କୋଟି ଟଙ୍କା ଖର୍ଚ୍ଚ କରୁଛି ।
ରାଉରକେଲାରେ ନୂଆ ଷ୍ଟାଡିୟମ ନିର୍ମାଣରେ ସର୍ବାଧିକ ୮୭୫.୭୮ କୋଟି ଟଙ୍କାର ନିବେଶ କରାଯାଉଛି, ଓ ଏହା ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ରହିଛି । ଆବାସ ଭବନ(ହୋଟେଲ) ନିର୍ମାଣ ପାଇଁ ୮୪ କୋଟି ଟଙ୍କା, ରାଉରକେଲାରେ ପାଶ୍ବବର୍ତ୍ତୀ ଅଞ୍ଚଳର ବିକାଶ କାର୍ଯ୍ୟ ପାଇଁ ୧୦.୫୦ କୋଟି ଟଙ୍କା ଓ ବିର୍ସା ମୁଣ୍ଡା ହକି ଷ୍ଟାଡିୟମର ବିଦ୍ୟୁତ କାର୍ଯ୍ୟ ପାଇଁ ୧୩ କୋଟି ଟଙ୍କା ଖର୍ଚ୍ଚ କରାଯାଉଛି ।
ବିର୍ସାମୁଣ୍ଡା ହକି ଷ୍ଟାଡିୟମ, ରାଉରକେଲା ଏହିପରି ରାଉରକେଲା ଓ ଭୁବନେଶ୍ବର ଦୁଇ ଷ୍ଟାଡିୟମରେ ସିନ୍ଥେଟିକ ଟର୍ଫ ଲଗାଇବା ପାଇଁ ସରକାର ହକି ଇଣ୍ଡିଆକୁ ୧୭.୫୦ କୋଟି ଟଙ୍କା ପ୍ରଦାନ କରିଛି । ସରକାର କାର୍ଯ୍ୟକ୍ରମ ସ୍ଥଳ ପ୍ରବନ୍ଧନ, ହୋଟେଲ, ପରିବହନ ଓ ମିଡିଆ ପ୍ରଚାର ଉପରେ ମଧ୍ୟ ୭୫ କୋଟି ଟଙ୍କା ଖର୍ଚ୍ଚ କରିବ । ଏହା ବ୍ୟତୀତ ରାଜ୍ୟ ଖେଳ ବିଭାଗ ଦ୍ବାରା କରାଯାଇଥିବା ଆକଳନ ଅନୁଯାୟୀ, ରାଉରକେଲାରେ ଏକ ସୁଇମିଂ ପୁଲ୍ର ବିକାଶ ପାଇଁ ୯.୧୫ କୋଟି ଟଙ୍କା, କଳିଙ୍ଗ ଷ୍ଟାଡିୟମରେ ଫ୍ଲଡ ଲାଇଟ୍ ଲଗାଇବା ପାଇଁ ୫.୩୯ କୋଟି ଟଙ୍କା ଓ ଷ୍ଟାଡିୟମରେ ଷ୍ଟାଣ୍ଡ୍ର ସଂପ୍ରସାରଣ କରିବାକୁ ୮ କୋଟି ଟଙ୍କା ଖର୍ଚ୍ଚ କରାଯିବ ।
୨୦୧୮ରେ ମୋଟ ୬୬.୯୮ କୋଟି ଟଙ୍କାରୁ, ଓଡି଼ଶା ସରକାର, ହକି ଇଣ୍ଡିଆ, ଏଫଆଇଏଚ୍କୁ(ଅନ୍ତର୍ଜାତୀୟ ହକି ମହାସଂଘ) ଭାଗିଦାର ଅଧିକାର ମୂଲ୍ୟ ରୂପେ ୨୫ କୋଟି ଟଙ୍କା ଜମା କରିଥିଲା । ଗତ ବିଶ୍ବକପରେ ବ୍ୟୟ ପରିବହନ, ଆବାସ, ପ୍ରଚାର-ପ୍ରସାର ଭେନ୍ୟୁ ଓ ଇଭେଣ୍ଟ ମ୍ୟାନେଜମେଣ୍ଟ ଆଦି ଉପରେ ୧୮.୮୯ କୋଟି ଟଙ୍କା ଖର୍ଚ୍ଚ ହୋଇଥିଲା ।
ରାଜ୍ୟ ସରକାର ଗତ ସଂସ୍କରଣ ତୁଳନାରେ ଚଳିତ ଥର ସମ୍ମାନଜନକ ମେଗା ଟୁର୍ଣ୍ଣାମେଣ୍ଟର ଆୟୋଜନ ବଡ ଓ ବିରାଟ ହେବାପାଇଁ ଏକାଧିକ ଯୋଜନା କରିଛନ୍ତି । ଟୁର୍ଣ୍ଣାମେଣ୍ଟରେ ଅଂଶଗ୍ରହଣକାରୀ ଟିମଗୁଡିକ ପାଇଁ ଓ ଦର୍ଶକଙ୍କ ପାଇଁ ଟୁର୍ଣ୍ଣାମେଣ୍ଟ ସ୍ମରଣୀୟ ଓ ଆକର୍ଷଣୀୟ କରିବାକୁ ରାଜ୍ୟରେ ଅନେକ ମେଗା ଖେଳ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଉଛି ।
ସୂଚନାଯୋଗ୍ୟ ଯେ, ବିଶ୍ବକପର ଆୟୋଜନ ଆସନ୍ତାବର୍ଷ ଜାନୁଆରୀ ୧୩ରୁ ୨୯ ତାରିଖ ମଧ୍ୟରେ ଭୁବନେଶ୍ବର ଓ ରାଉରକେଲାରେ ଆୟୋଜନ ହେବ ।
