ନୂଆଦିଲ୍ଲୀ: ଅଲମ୍ପିକ୍ ସ୍ବର୍ଣ୍ଣ ବିଜେତା ନୀରଜ ଚୋପ୍ରା, ପାରାଲମ୍ପିକ ସ୍ବର୍ଣ୍ଣ ବିଜେତା ପ୍ରମୋଦ ଭଗତ, ସୁମିତ ଅଣ୍ଟିଲ ଓ ମହିଳା କ୍ରିକେଟ ମିତାଲି ରାଜଙ୍କ ସମେତ ଅନ୍ୟ ୮ଜଣଙ୍କୁ ମିଳିଲା ଦେଶର ସର୍ବୋଚ୍ଚ କ୍ରୀଡା ସମ୍ମାନ ମେଜର ଧ୍ୟାନଚାନ୍ଦ 'ଖେଳରତ୍ନ' ପୁରସ୍କାର । ରବିବାର ରାଷ୍ଟ୍ରପତି ଭବନରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ରାଷ୍ଟ୍ରପତି ରାମନାଥ କୋବିନ୍ଦ ଖେଳାଳିଙ୍କୁ ପୁରସ୍କାର ପ୍ରଦାନ କରିଛନ୍ତି । ସେହିପରି ଭବ୍ୟ ପୁରସ୍କାର ବିତରଣ ସମୋରୋହରେ ୩୫ଜଣ ଆଥଲେଟ୍ଙ୍କୁ ଅର୍ଜୁନ ଆୱାର୍ଡରେ ସମ୍ମାନିତ କରାଯାଇଛି ।
ଟୋକିଓ ଅଲମ୍ପିକ୍ରେ ପ୍ରଥମ ଭାରତୀୟ ଭାବେ ଆଥଲେଟିକ୍ସରେ ସ୍ବର୍ଣ୍ଣ ପଦକ ଜିତିଥିବା ନୀରଜ ଚୋପ୍ରା, ରାଷ୍ଟ୍ରପତି କୋବିନ୍ଦଙ୍କ ଠାରୁ ପୁରସ୍କାର ଗ୍ରହଣ କରିଛନ୍ତି । ଏହି ପୁରସ୍କାର ବିତରଣ ଉତ୍ସବରେ ବହୁ ମନ୍ତ୍ରୀ, ମାନ୍ୟଗଣ୍ୟ ବ୍ୟକ୍ତି ଏବଂ କ୍ରୀଡା ସେଲିବ୍ରିଟି ଉପସ୍ଥିତି ଥିଲେ । ପୁରସ୍କାର ଗ୍ରହଣ ପାଇଁ ନୀରଜଙ୍କ ନାମ ଘୋଷଣା ପରେ କରତାଳିରେ ପ୍ରକମ୍ପିତ ହୋଇଥିଲା ସମାରୋହ ।
ମୋଟ ୧୨ଜଣ କ୍ରୀଡାବିତ୍ଙ୍କୁ ଖେଳରତ୍ନ ପ୍ରଦାନ କରାଯାଇଛି- ନୀରଜ ଚୋପ୍ରା(ଆଥଲେଟିକ୍ସ), ରବି ଦହିୟା(କୁସ୍ତି), ଲଭଲିନା ବୋର୍ଗୋହେନ(ବକ୍ସିଂ), ପିଆର ଶ୍ରୀଜେଶ(ହକି), ଅବନୀ ରେଖାରା(ପାରା-ସୁଟିଂ), ସୁମିତ ଅଣ୍ଟିଲ(ପାରା-ଅଥଲେଟିକ୍ସ), ପ୍ରମୋଦ ଭଗତ (ପାରା-ବ୍ୟାଡ୍ମିଣ୍ଟନ), କ୍ରୀଷ୍ଣା ନାଗର(ପାରା-ବ୍ୟାଡ୍ମିଣ୍ଟନ), ମନୀଷ ନରୱାଲ(ପାରା-ସୁଟିଂ), ମିତାଲି ରାଜ(କ୍ରିକେଟ), ସୁନୀଲ ଛେତ୍ରୀ(ଫୁଟବଲ୍) ଓ ମନପ୍ରୀତ ସିଂହ(ହକି) ।
ତେବେ ୨୦୨୦ ପାରାଲମ୍ପିକ୍ସ ସ୍ବର୍ଣ୍ଣ ବିଜେତା କ୍ରୀଷ୍ଣା ନାଗର ପୁରସ୍କାର ବିତରଣ ସମାରୋହରେ ଉପସ୍ଥିତ ରହିପାରି ନାହାଁନ୍ତି । ସୂଚନା ଅନୁଯାୟୀ, ଶୁକ୍ରବାର ରାତିରେ ତାଙ୍କର ମାଆଙ୍କ ଦେହାନ୍ତ ହୋଇଥିବା ଜଣାପଡିଛି ।
ସେହିପରି ଟୋକିଓ ୨୦୨୦ ଅଲମ୍ପିକ୍ସରେ ଐତିହାସିକ ବ୍ରୋଞ୍ଜ ପଦକ ଜିତିଥିବା ଭାରତୀୟ ପୁରୁଷ ହକି ଟିମର ସମସ୍ତ ସଦସ୍ୟ ଅର୍ଜୁନ ଆୱାର୍ଡ ଗ୍ରହଣ କରିଛନ୍ତି । ଶ୍ରୀଜେଶ ଓ ମନପ୍ରୀତ ପୂର୍ବରୁ ଏହି ସମ୍ମାନ ଗ୍ରହଣ କରିସାରିଛନ୍ତି ।
ଅର୍ଜୁନ ଆୱାର୍ଡ ଗ୍ରହଣ କରିଥିବା ଖେଳାଳିଙ୍କ ସଂପୂର୍ଣ୍ଣ ସୂଚୀ: