ରାଉରକେଲା: ରାଜ୍ୟରେ ଜାରି ରହିଥିବା ହକି ବିଶ୍ବକପ ୨୦୨୩ରେ ଶନିବାର ମାଲେସିଆକୁ ୪-୦ରେ ପରାସ୍ତ କରିଛି ନେଦରଲାଣ୍ଡ । ରାଉରକେଲା ବିର୍ସା ମୁଣ୍ଡା ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚ୍ର ପ୍ରଥମ କ୍ବାର୍ଟରରେ କଡ଼ା ମୁକାବିଲା ଦେଖିବାକୁ ମିଳିଥିଲା । ଦ୍ବିତୀୟ କ୍ବାର୍ଟରରେ ମାଲେସିଆକୁ ୨ଟି ଗୋଲ ଦେଇଥିଲା ନେଦରଲାଣ୍ଡ । ୨୦ ମିନିଟରେ ଥିଜ୍ସ ଭାନ ଦାମ୍ ଫିଲ୍ଡ ଗୋଲ ଦେଇଥିଲେ । ଜିପ୍ ଜନ୍ସିନ୍ ୨୪ ମିନିଟରେ ପେନାଲ୍ଟି ଗୋଲ ଦେଇ ଦଳକୁ ୨-୦ରେ ଆଗୁଆ କରିଥିଲେ ।
ଏହି ମ୍ୟାଚର ତୃତୀୟ କ୍ବାର୍ଟର ସୁଦ୍ଧା ମାଲେସିଆକୁ ୩ ଥର ପେନାଲ୍ଟି ସୁଯୋଗ ମିଳିଥିଲେ ମଧ୍ୟ ମାଲେସିଆ ଦଳର ଖେଳାଳିମାନେ ଏହାର ଫାଇଦା ଉଠାଇ ପାରିନଥିଲେ । ଚତୁର୍ଥ ତଥା ଶେଷ କ୍ବାର୍ଟରରେ ନେଦରଲାଣ୍ଡର ଖେଳାଳି ଟେଉନ୍ ବେନିସ୍ ୪୭ ମିନିଟରେ ପେନାଲ୍ଟି ଗୋଲ ଦେଇଥିଲେ । ଜୋରିଟ୍ କ୍ରୋନ୍ ୫୯ ମିନିଟରେ ଫିଲ୍ଡ ଗୋଲ୍ ଦେଇଥିଲେ ।