ବେଙ୍ଗାଲୁରୁ: ଖେଲୋ ଇଣ୍ଡିଆ ୟୁନିଭରସିଟି ଗେମ୍ସ(KIUG) ୨୦୨୧ର ନୂଆ ଲୋଗୋ, ଜର୍ସି, ମାସକଟ୍ ଓ ଆନ୍ଥେମ ଶ୍ରୀ କାନ୍ତିରାବା ଷ୍ଟାଡିୟମରେ ଆୟୋଜିତ ଭବ୍ୟ କାର୍ଯ୍ୟକ୍ରମରେ ଉନ୍ମୋଚିତ ହୋଇଛି । ଏହି କାର୍ଯ୍ୟକ୍ରମରେ କେନ୍ଦ୍ର କ୍ରୀଡାମନ୍ତ୍ରୀ ଅନୁରାଗ ଠାକୁର, କର୍ଣ୍ଣାଟକ ରାଜ୍ୟପାଳ ଟିସି ଗେହଲଟ୍ ଉପସ୍ଥିତ ରହିଥିଲେ ।
KIUG 2021, ପ୍ରତିଯୋଗିତାର ଦ୍ବିତୀୟ ସଂସ୍କରଣ ହେବ । ଏପ୍ରିଲ ୨୪ରୁ ମଇ ୩ ପର୍ଯ୍ୟନ୍ତ ବେଙ୍ଗାଲୁରୁର ଜେନ ୟୁନିଭରସିଟିରେ ଏହି ମେଗା ପ୍ରତିଯୋଗିତା ଆୟୋଜିତ ହେବ । ଗତବର୍ଷ COVID-19 ମହାମାରୀ ପାଇଁ ଏହି ସମ୍ମାନଜନକ ଇଭେଣ୍ଟ ସ୍ଥଗିତ ରହିଥିଲା । ଯୋଗାସନ ସମେତ ମୋଟ ୧୮ଟି ଭିନ୍ନ ଭିନ୍ନ ଖେଳରେ ସମଗ୍ର ଦେଶରୁ ପ୍ରାୟ ୪,୫୦୦ ଆଥଲେଟ୍ ଏହି ପ୍ରତିଯୋଗିତାରେ ଅଂଶଗ୍ରହଣ କରିବା ନେଇ ଆଶା ରହିଛି । ଉନ୍ମୋଚିତ ହୋଇଥିବା ନୂଆ ଲୋଗୋରେ କର୍ଣ୍ଣାଟକ ବିଧାନସୌଧକୁ ସ୍ଥାନିତ କରାଯାଇଛି । ଉଭୟ ପାର୍ଶ୍ବରେ ଦୁଇଟି ହାତୀ ରହିଛନ୍ତି । ସେହିପରି ଖେଲୋ ଇଣ୍ଡିଆ ୟୁନିଭରସିଟି ଗେମ୍ସର ମାସକଟ୍ରେ ମଧ୍ୟ ଏଖ ହାତୀ ରହିଛି ଯାହାର ନାମ ରହିଛି ବୀର ।