ଭୁବନେଶ୍ବର: ମଧ୍ୟପ୍ରଦେଶର ଭୋପାଳରେ ଜାରି ରହିଥିବା ଖେଲୋ ଇଣ୍ଡିଆ ୟୁଥ ଗେମ୍ସରେ ଓଡିଶା ଆଥଲେଟଙ୍କ ଭଲ ପ୍ରଦର୍ଶନ ଦେଖିବାକୁ ମିଳିଛି । ବିଭିନ୍ନ ଇଭେଣ୍ଟରେ ଦମଦାର ପ୍ରଦର୍ଶନ କରି ଓଡିଶାକୁ ପଦକ ଭେଟି ଦେଇଛନ୍ତି । ସୋମବାର ଅନୁଷ୍ଠିତ ଇଣ୍ଟେଣ୍ଟରେ ଓଡିଶାକୁ ଦୁଇଟି ପଦକ ମିଳିଛି । ଦୁଇଟି ଯାକ ପଦକ ଭାରଉତ୍ତୋଳନରେ ମିଳିଛି । ଜ୍ୟୋସ୍ନା ସବର ରୌପ୍ୟ ଓ ପ୍ରୀତିସ୍ମିତା କାଂସ୍ୟ ପଦକ ଜିତିଛନ୍ତି । ଉଭୟଙ୍କୁ ଟ୍ବିଟ୍ କରି ଓଡିଶା ସ୍ପୋର୍ଟ୍ସ ଶୁଭେଚ୍ଛା ଜଣାଇଛି ।
ମହିଳା 40 କେଜି ବର୍ଗରେ 118କେଜି ଭାରୋଉତ୍ତୋଳନ କରି ଦ୍ବିତୀୟ ସ୍ଥାନ ସହ ଜ୍ୟୋସ୍ନା ସବର ରୌପ୍ୟ ପଦକ ଜିତିଛନ୍ତି । 40 କେଜି ବର୍ଗରେ ଜ୍ୟୋସ୍ନା 53 କେଜି ସ୍ନାଚ ଓ 65 କେଡି କ୍ଲିନ ଆଣ୍ଡ ଜର୍କ ସହ 118 କେଜି ଭାର ଉଠାଇଥିଲେ । ସେହିପରି ଅନ୍ୟତମ ଭାରଉତ୍ତୋଳିକା ପ୍ରୀତିସ୍ମିତା ମହିଳା 40 କେଜି ବର୍ଗରେ 117 କେଜି ଭାର ଉଠାଇ ତୃତୀୟ ସ୍ଥାନ ସହ ବ୍ରୋଞ୍ଜ ପଦକ ହାସଲ କରିଛନ୍ତି । ସେ 53 କେଜି ସ୍ନାଚ୍ ଓ 64 କେଜି କ୍ଲିନ ଆଣ୍ଡ ଜର୍କ ସହ 117 କେଜି ଭାର ଉଠାଇଥିଲେ । ଏହି ବର୍ଗରେ ମହାରାଷ୍ଟ୍ରର ଭିନାତାଇ ଆହେର ମୋଟ 129 କେଜି ଭାର ଉଠାଇ ସ୍ବର୍ଣ୍ଣ ପଦକ ଜିତିଥିଲେ ।