ରାଜ୍ୟଗୋଷ୍ଠୀ କ୍ରୀଡା ମହାସଂଘ ନିର୍ବାଚନ ଲଢିବେ ପିଟି ଉଷା

କିମ୍ବଦନ୍ତୀ ଆଥଲେଟ ପିଟି ଉଷା ରାଜ୍ୟଗୋଷ୍ଠୀ କ୍ରୀଡା ମହାସଂଘ ନିର୍ବାଚନ ଲଢିବାକୁ ଯାଉଛନ୍ତି । ଅଧିକ ପଢନ୍ତୁ

ନୂଆଦିଲ୍ଲୀ:ଭାରତୀୟ ଅଲମ୍ପିକ ସଂଘର ଅଧ୍ୟକ୍ଷା ତଥା କିମ୍ବଦନ୍ତୀ ଆଥଲେଟ ପିଟି ଉଷା କ୍ରୀଡା ପ୍ରଶାସକ ଭାବେ ଆଉ ପାଦେ ଆଗକୁ ବଢିବାକୁ ଯାଉଛନ୍ତି । ରାଜ୍ୟଗୋଷ୍ଠୀ କ୍ରୀଡା ମହାସଂଘ ନିର୍ବାଚନରେ ଉପସଭାପତି ପଦ ପାଇଁ ନିର୍ବାଚନ ଲଢିବେ ପିଟି ଉଷା । ରାଜ୍ୟ ଗୋଷ୍ଠୀ କ୍ରୀଡା ଫେଡେରେସନର ଆଗାମୀ ନିର୍ବାଚନ ପାଇଁ ପ୍ରାର୍ଥୀ ତାଲିକା ପ୍ରକାଶ ପାଇଛି । ଆଇଓଏ ସଭାପତି ଥିବା ପିଟି ଉଷା ଉପସଭାପତି ପ୍ରାର୍ଥୀ ପାଇଁ ନାମାଙ୍କନ ଦାଖଲ କରିଛନ୍ତି ।

14 ଓ 15 ସେପ୍ଟେମ୍ବରରେ ସିଙ୍ଗାପୁରରେ ରାଜ୍ୟଗୋଷ୍ଠୀ କ୍ରୀଡା ମହାସଂଘ ନିର୍ବାଚନ ହେବ । ଏଥିରେ ସଭାପତି, ଉପସଭାପତି, ଆଞ୍ଚଳିକ ଉପସଭାପତି ଏବଂ କ୍ରୀଡା କମିଟି ସଦସ୍ୟ ପଦ ପାଇଁ ନିର୍ବାଚନ ହେବ । ସମସ୍ତ ନିର୍ବାଚିତ ପ୍ରତିନିଧି ଆଗାମୀ 4 ବର୍ଷ ଯାଏ କାର୍ଯ୍ୟ ତୁଲାଇବେ । 59 ବର୍ଷୀୟ ପିଟି ଉଷାଙ୍କ ସମେତ ଦକ୍ଷିଣ ଆଫ୍ରିକାର ବ୍ୟାରୀ ହେଣ୍ଡ୍ରିକ୍ସ, ବାର୍ବାଡସର ସାନ୍ଦ୍ରା ଓସବୋର୍ନୋ, କନାଡାର ରିଟାର୍ଡ ପାୱାର, ସ୍କଟଲାଣ୍ଡର ଇଆନ ରିଡ ଓ ଉଗାଣ୍ଡାର ରୁକା ଉପସଭାପତି ଦୌଡରେ ରହିଛନ୍ତି । ସେହିପରି ଆଞ୍ଚଳିତ ଉପସଭାପତି ପଦରେ ସିଙ୍ଗାପୁରର ଖ୍ରୀଷ୍ଟଫର, ଶ୍ରୀଲଙ୍ଗାରୁ ମ୍ୟାକ୍ସୱେଲ ଡିସିଲଭା ପ୍ରାର୍ଥୀ ପତ୍ର ଦାଖଲ କରିଛନ୍ତି । ସିଜିଏଫ ସଭାପତି ପାଇଁ ୱେଲ୍ଡର କ୍ରିସ ଜେଙ୍କିନସ ଓ ନ୍ୟୁଜିଲାଣ୍ଡର କେରିନ ସ୍ମିଥଙ୍କ ମଧ୍ୟରେ ଲଢେଇ ହେବ ।

ପ୍ରକାଶ ଥାଉ କି, ଦୌଡରାଣୀ ପିଟି ଉଷା ଭାରତୀୟ ଅଲମ୍ପିକ ସଂଘର ପ୍ରଥମ ମହିଳା ଅଧ୍ୟକ୍ଷ ଭାବେ ଦାୟିତ୍ବ ତୁଲାଉଛନ୍ତି । ଗତବର୍ଷ ଡିସେମ୍ବର 22 ତାରିଖକୁ ତାଙ୍କୁ ଆଇଓଏ ସଭାପତି ଭାବେ ନିଯୁକ୍ତ କରାଯାଇଥିଲା । ସେ ନିର୍ଦ୍ବନ୍ଦରେ ନିର୍ବାଚିତ ହୋଇଥିଲେ । ଆଇଓଏ ସଭାପତି ପଦ ଅଳଙ୍କୃତ କରିବାରେ ସେ ପ୍ରଥମ ମହିଳା ଥିଲେ ।

ଷ୍ଟାର ଧାବିକା ପିଟି ଉଷା ଭାରତର ଜଣେ ମହାନତମ ଆଥଲେଟ । ପିଟି ଉଷା ଭାରତକୁ ଏସିଆନ ଗେମ୍ସରେ 4ଟି ସ୍ବର୍ଣ୍ଣ ଓ 7ଟି ରୌପ୍ୟ ପଦକ ଭେଟି ଦେଇଥିଲେ । ଲସ୍ ଆଞ୍ଜେଲସ୍‌ରେ ତାଙ୍କର ଟାଇମିଂ ଥିଲା 55.42 ସେକେଣ୍ଡ ଯାହାକି ଅତୁଟ ରହିଛି । ପିଟି ଉଷା ଭାରତୀୟ ଜନତା ପାର୍ଟି ଦ୍ବାରା ରାଜ୍ୟସଭାକୁ ମଧ୍ୟ ମନୋନୀତ ହୋଇଥିଲେ ।