ହାଇଦ୍ରାବାଦ: ବିଶ୍ବ ଆଣ୍ଟି ଡୋପିଂ ଏଜେନ୍ସି (World Anti-Doping Agency) ପକ୍ଷରୁ ୨୦୨୦ ବର୍ଷର ରିପୋର୍ଟ ପ୍ରକାଶ ପାଇଛି । ଏହି ରିପୋର୍ଟ ଅନୁସାରେ ନିଷିଦ୍ଧ ଔଷଧ ସେବନ (Anti-Doping) ନିୟମ ଉଲ୍ଲଙ୍ଘନରେ ଦ୍ବିତୀୟ ସ୍ଥାନରେ ରହିଛି ଭାରତ । ୫୯ ମାମଲାରେ ଭାରତ ନିୟମ ଉଲ୍ଲଙ୍ଘନ କରିଥିବା ବେଳେ ରୁଷିଆ ସବୁଠୁ ଅଧିକ ୧୩୫ ଥର ଆଣ୍ଟି ଡୋପିଂ ନିୟମ ଉଲ୍ଲଙ୍ଘନ କରି ଏହି ମାମଲାରେ ପ୍ରଥମ ସ୍ଥାନରେ ରହିଛି । ୨୦୧୩ ମସିହାରୁ ବିଶ୍ବରେ ଭାରତ ଶୀର୍ଷ ୭ଟି ଦେଶ ମଧ୍ୟରେ ରହି ଆସୁଛି । ୨୦୧୪, ୨୦୧୫ ଓ ୨୦୧୯ରେ ଭାରତ ତୃତୀୟରେ ରହିଥିଲା ବେଳେ ୨୦୧୮ରେ ଚତୁର୍ଥକୁ ଖସିଥିଲା ।
୨୦୨୨ ନଭେମ୍ବର ୧୦ ତାରିଖ ମଧ୍ୟରେ ଗ୍ରହଣ କରାଯାଇଥିବା ତଥ୍ୟକୁ ଆଧାର କରି ୨୦୨୦ ବର୍ଷ ପାଇଁ ଆଣ୍ଟି ଡୋପିଂ ଉଲ୍ଲଙ୍ଘନ ରିପୋର୍ଟ ପ୍ରସ୍ତୁତ କରିଛି WADA । ୨୦୨୦ ମସିହାରେ ଭାରତରେ ୬୫ ରକ୍ତ ନମୂନା ସହ ମୋଟ ୧୧୮୬ ନମୂନା ପରୀକ୍ଷା କରିଥିଲା ଜାତୀୟ ଆଣ୍ଟି ଡୋପିଂ ଏଜେନ୍ସି (National Anti-Doping Agency) । ତେବେ ଏହି ପରୀକ୍ଷାଗୁଡ଼ିକ ମଧ୍ୟରୁ ୫୫ ନମୂନା ପଜିଟିଭ୍ ଆସିଥିଲା । କୌଣସି ଜାତୀୟ ଆଣ୍ଟି ଡୋପିଂ ସଂଗଠନ ଦ୍ବାରା ୧୦୦୦ କିମ୍ବା ଏହାଠାରୁ ଅଧିକ ନମୂନା ପରୀକ୍ଷାରୁ ଆସିଥିବା ରିପୋର୍ଟ ତୁଳନାରେ ଭାରତରୁ ଆସିଥିବା ସଂଖ୍ୟା ସର୍ବାଧିକ ଥିଲା । ଏହି ସମସ୍ତ ୫୫ ନମୂନାକୁ ଆଣ୍ଟି ଡୋପିଂ ନିୟମ ଉଲ୍ଲଙ୍ଘନ ସଂଖ୍ୟା ଭାବେ ପ୍ରକାଶିତ ରିପୋର୍ଟରେ ଦର୍ଶାଇଛି ବିଶ୍ବ ଆଣ୍ଟି ଡୋପିଂ ଏଜେନ୍ସି ।