ହାଇଦ୍ରାବାଦ: ଭାରତୀୟ ହକି ଦଳର ଡିଫେଣ୍ଡର ତଥା ଉପଅଧିନାୟକ ହରମନପ୍ରିତ ସିଂହଙ୍କୁ (Harmanpreet Singh) ଲଗାତାର ଦ୍ବିତୀୟ ବର୍ଷ ପାଇଁ FIH ପ୍ଲେୟର ଅଫ ଦି ଇୟର ଭାବେ ଚୟନ କରାଯାଇଛି । ବିଗତ ବର୍ଷରେ ତାଙ୍କ ଚମତ୍କାର ଡିଫେଣ୍ଡିଂ କ୍ଷମତା ପାଇଁ FIH ଏହି ପୁରସ୍କାର ପ୍ରଦାନ କରିଛି । ଏହି ପୁରସ୍କାର ପାଇଁ ଚୟନ କରାଯାଇଥିବା ଲିସ୍ଟରେ ହରମନପ୍ରିତ ୨୯.୪ ପଏଣ୍ଟ ସହିତ ଶୀର୍ଷରେ ରହିଛନ୍ତି । ପୂର୍ବ ଅପେକ୍ଷା ସେ ଏବେ ଉତ୍ତମ ପ୍ରଦର୍ଶନ ଜାରି ରଖିଛନ୍ତି । ଏ ବାବଦରେ FIH କହିଛି ଯେ, ହରମନପ୍ରୀତ ଆଧୁନିକ ଯୁଗର ଜଣେ ହକି ସୁପରଷ୍ଟାର ଅଟନ୍ତି । ସେ ଜଣେ ଜବରଦସ୍ତ ଡେଫେଣ୍ଡର । ପ୍ରତିଦ୍ବନ୍ଦୀଙ୍କୁ ମାତ୍ ଦେବା ପାଇଁ ଠିକ ଜାଗାରେ ଠିକ ସମୟରେ ପହଞ୍ଚିବାରେ ତାଙ୍କ ପାଖରେ ଉପଯୁକ୍ତ କ୍ଷମତା ରହିଛି ।
ପ୍ରୋ ଲିଗ୍ ମ୍ୟାଚରେ ହରମନପ୍ରୀତଙ୍କ ରେକର୍ଡ
ବର୍ତ୍ତମାନ ଭାରତୀୟ ହକି ଦଳର ଉପଅଧିନାୟକ ଦାୟିତ୍ବରେ ରହିଛନ୍ତି ହରମନପ୍ରୀତ ସିଂହ । ସେ ଭାରତର ପ୍ରତିନିଧିତ୍ବ କରି 155ଟି ମ୍ୟାଚ୍ ଖେଳି ସାରିଛନ୍ତି । ପ୍ରୋ ଲିଗ ମ୍ୟାଚରେ ସେ ଜବରଦସ୍ତ ଡିଫେଣ୍ଡିଂ କୌଶଳ ପ୍ରଦର୍ଶନ କରି ରେକର୍ଡ କରିଥିଲେ ।