ଭୁବନେଶ୍ବର: କଳିଙ୍ଗ ଷ୍ଟାଡିୟମ୍ରେ ଜାରି ରହିଥିବା ଇଣ୍ଟରକଣ୍ଟିନେଣ୍ଟାଲ୍ କପ୍ ଫାଇନାଲ୍ ମ୍ୟାଚ୍ ଶେଷ ହୋଇଛି । ଫାଇନାଲ୍ ମୁକାବିଲାରେ ଲେବାନନ୍କୁ ୨-୦ରେ ପରାସ୍ତ କରି ଟାଇଟଲ ହାତେଇଛି ଟିମ୍ ଇଣ୍ଡିଆ । ଭାରତୀୟ ଅଧିନାୟକ ସୁନୀଲ ଛେତ୍ରୀ ଓ ଲାଲ୍ଲିଆଞ୍ଜୁଆଲା ଛାଙ୍ଗ୍ଟେ ଗୋଲ୍ ବଳରେ ଭାରତ ଚମ୍ପିଆନ୍ । ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟକୁ ଅପରାଜିତ ରହି ଶେଷ କରିଛି ଭାରତ । କଳିଙ୍ଗ ଷ୍ଟାଡିୟମ୍ରେ ଦର୍ଶକଙ୍କ ସମର୍ଥନ ପାଇଁ ଧନ୍ୟବାଦ ଜଣାଇଛନ୍ତି ଭାରତୀୟ ଫୁଟ୍ବଲ୍ ଦଳର ଅଧିନାୟକ ସୁନୀଲ ଛେତ୍ରୀ ।
ଆଜି କଳିଙ୍ଗ ଷ୍ଟାଡିୟମରେ ଖେଳାଯାଇଥିବା ଏହି ଫାଇନାଲ ମ୍ୟାଚ୍ରେ ପ୍ରଥମାର୍ଦ୍ଧରେ ଉଭୟ ଦଳ ମଧ୍ୟରେ କଡ଼ା ମୁକାବିଲା ଦେଖିବାକୁ ମିଳିଥିଲା । ହେଲେ ଏହା ଗୋଲଶୂନ୍ୟ ରହିଥିଲା । ଦ୍ବିତୀୟାର୍ଦ୍ଧରେ ଭାରତୀୟ ଦଳର ଅଧିନାୟକ ସୁନୀଲ ଛେତ୍ରୀ ଦଳ ପକ୍ଷରୁ ପ୍ରଥମ ଗୋଲ୍ ସ୍କୋର କରିଥିଲେ । ଏହି ଗୋଲ ସହ ଭାରତକୁ ୧-୦ରେ ଆଗୁଆ କରାଇଥିଲେ ଛେତ୍ରୀ । ଭାରତ ପକ୍ଷରୁ ଲାଲ୍ଲିଆଞ୍ଜୁଆଲା ଛାଙ୍ଗ୍ଟେ ଦ୍ୱିତୀୟ ଗୋଲ୍ ସ୍କୋର୍ କରି ଦଳକୁ ୨-୦ ଭଳି ମଜବୁତ ସ୍ଥିତିକୁ ନେବା ସହିତ ଦଳର ବିଜୟ ନିଶ୍ଚିତ କରିଥିଲେ । ଭାରତ ସମଗ୍ର ଟୁର୍ଣ୍ଣାମେଣ୍ଟରେ ଅପରାଜିତ ରହି ଚମ୍ପିଆନ ହୋଇଛି ।