ନୂଆଦିଲ୍ଲୀ: ଟୋକିଓ ଅଲମ୍ପିକ୍ ଗେମ୍ସରେ ସ୍ବର୍ଣ୍ଣ ପଦକ ହାସଲ କରିବା ପରେ ବର୍ତ୍ତମାନ ଦେଶରେ ଚର୍ଚ୍ଚାରେ ରହିଛନ୍ତି ଜାଭେଲିନ ଥ୍ରୋ ଖେଳାଳି ନୀରଜ ଚୋପ୍ରା । ସଭିଏଁ ନୀରଜଙ୍କ ବିଷୟରେ ଜାଣିବାକୁ ବ୍ୟାଗ୍ର ରହିଛନ୍ତି । ସେ ତାଙ୍କ ସ୍ବର୍ଣ୍ଣ ପଦକ ହାସଲର ସଫଳତାର କାହାଣୀ ହେଉ ବା ତାଙ୍କ ବ୍ୟକ୍ତିଗତ ଜୀବନର କାହାଣୀ । ତେବେ ଏହାରି ମଧ୍ୟରେ ନୀରଜ ଚୋପ୍ରାଙ୍କୁ ସାକ୍ଷାତକାରକୁ ଡାକି କେତେକ ଜଣାଶୁଣା ଚେହେରା ଏଭଳି କିଛି ପ୍ରଶ୍ନ ପଚାରିଛନ୍ତି, ଯାହା ଶାଳୀନତାର ସମସ୍ତ ସୀମା ଟପି ଯାଇଛି । ଏଥିପାଇଁ ସାକ୍ଷାତକାର ନେଉଥିବା ବ୍ୟକ୍ତିଙ୍କୁ ମଧ୍ୟ କମ ସମାଲୋଚନାର ଶିକାର ହେବାକୁ ପଡ଼ିନାହିଁ ।
ରାଜୀବ ସେଠୀ ନାମକ ଜଣେ ଇତିହାସକାର ଅଲମ୍ପିକ୍ସ ସ୍ବର୍ଣ୍ଣ ପଦକ ବିଜେତା ନୀରଜ ଚୋପ୍ରାଙ୍କ ସହ ଏକ ସକ୍ଷାତକାର କରିଥିଲେ । ତେବେ ରାଜୀବ ନୀରଜଙ୍କୁ ଏଭଳି ଏକ ପ୍ରଶ୍ନ ପଚାରିଥିଲେ, ଯାହାଫଳରେ ବର୍ତ୍ତମାନ ତାଙ୍କୁ ସୋସିଆଲ ମିଡିଆରେ ସମାଲୋଚନାର ଶିକାର ହେବାକୁ ପଡ଼ିଛି । ନୀରଜ ତାଙ୍କ ସେକ୍ସ ଲାଇଫ ଓ ସ୍ପୋର୍ଟସ ଲାଇଫକୁ କିଭଳି ବାଲାନ୍ସ କରୁଛନ୍ତି ବୋଲି ପ୍ରଶ୍ନ କରିଥିଲେ ରାଜୀବ । ତେବେ ଏହି ପ୍ରଶ୍ନକୁ ନେଇ କିଛି ଉତ୍ତର ଦେବାକୁ ମନା କରି ଦେଇଥିଲେ ନୀରଜ । ଏହାପରେ ପୁନଃ ରାଜୀବ ସେହି ପ୍ରଶ୍ନର ଉତ୍ତର ରଖିବାକୁ ନୀରଜଙ୍କ ଉପରେ ଚାପ ପକାଇଥଲେ ।