ନୂଆଦିଲ୍ଲୀ: ଟୋକିଓ ଅଲମ୍ପିକ୍ସ ଟିକେଟ ହାତେଇଲେ କୋଲକାତାର ଜିମ୍ନାଷ୍ଟ ପ୍ରଣତୀ ନାଏକ । ଏସିଆନ ଚମ୍ପିଆନସିପ ବ୍ରୋଞ୍ଜ ବିଜୟିନୀ ପ୍ରଣତୀ ଆସନ୍ତାମାସରେ ଟୋକିଓ ଅଲମ୍ପିକ୍ସରେ ଅଂଶଗ୍ରହଣ କରିବେ । ଅନ୍ତର୍ଜାତୀୟ ଜିମ୍ନାଷ୍ଟିକ୍ସ ଫେଡେରେସନ(FIG) ସୋମବାର ଏହି ଘୋଷଣା କରିଛି ।
ଗତ ମଇ ମାସରେ ଟୋକିଓରେ ଏସିଆନ ଚମ୍ପିଆନସିପ ହେବା ନେଇ ସୂଚୀ ରହିଥିଲା । ତେବେ କୋଭିଡ-19 ମହାମାରୀ ଯୋଗୁଁ ଏହି ପ୍ରତିଯୋଗିତା ବାତିଲ ହୋଇଥିଲା । "ଜିମ୍ନାଷ୍ଟିକ୍ସର ଅନ୍ତର୍ଜାତୀୟ ପରିଚାଳନା ପରିଷଦ ସୋମବାର ସନ୍ଧ୍ୟାରେ ପ୍ରଣତୀ ନାଏକ ଅଲମ୍ପିକ୍ସରେ ଅଂଶଗ୍ରହଣ କରିବା ନେଇ 'ରିଆଲୋକେଟଡ୍ ମହାଦେଶୀୟ କୋଟା'ରେ ଏକ ସ୍ଥାନ ହାସଲ କରିଛନ୍ତି । ଏନେଇ ସୋମବାର ସନ୍ଧ୍ୟାରେ ଔପଚାରିକ ଭାବେ ଜିମ୍ନାଷ୍ଟିକ୍ସର ଅନ୍ତର୍ଜାତୀୟ ପରିଚାଳନା ପରିଷଦ ଜଣାଇଛି ।" କୋଲକାତାରୁ ଏହା କହିଛନ୍ତି ପ୍ରଣତୀଙ୍କ କୋଚ୍ ଲଖନ ଶର୍ମା ।
ମହାମାରୀ କୋରୋନା ଭାଇରସ ପାଇଁ ଏକାଧିକ ଅଲମ୍ପିକ ଯୋଗ୍ୟତା ପର୍ଯ୍ୟାୟ ପ୍ରତିଯୋଗିତା ବାତିଲ ଓ ସ୍ଥଗିତ ହୋଇଥିଲା । ଫଳରେ 2019 ଏସିଆନ ଚମ୍ପିଆନସିପ ପ୍ରଦର୍ଶନ ଆଧାରରେ FIG ପ୍ରଣତୀଙ୍କୁ ଅଲମ୍ପିକ ଟିକେଟ ପ୍ରଦାନ କରିଛି ।