ଭୁବନେଶ୍ବର: ହକି ବିଶ୍ବକପ ୨୦୨୩ରେ ସୋମବାର ଲାଗିଥିବା ତୃତୀୟ ମ୍ୟାଚରେ ଦକ୍ଷିଣ ଆଫ୍ରିକାକୁ ହରାଇଲା ଫ୍ରାନ୍ସ । ଏହି ମ୍ୟାଚ୍ରେ କଡ଼ା ମୁକାବିଲା ଦେଖିବାକୁ ମିଳିଥିବାବେଳେ ଶେଷରେ ୨-୧ ଗୋଲରେ ବିଜୟ ଲାଭ କରିଛି ଫ୍ରାନ୍ସ । ତୃତୀୟ କ୍ବାର୍ଟର ଭିତରେ ଉଭୟ ଦଳ ୧-୧ ଗୋଲରେ ବରାବର ଥିବା ସତ୍ତ୍ବେ ଚତୁର୍ଥ କ୍ବାର୍ଟରରେ ଫ୍ରାନ୍ସ ଅଧିନାୟକ ଚାର୍ଲେଟ ଭିକ୍ଟରଙ୍କ ଦ୍ବିତୀୟ ଗୋଲ ବଳରେ ବିଜୟୀ ହୋଇଥିଲା ଫ୍ରାନ୍ସ ଦଳ । ଦକ୍ଷିଣ ଆଫ୍ରିକା ଦଳ ତରଫରୁ ବିଉଚାମ୍ପ କନ୍ନର ହିଁ ଏକମାତ୍ର ଗୋଲ କରିଥିଲେ ।
ଦକ୍ଷିଣ ଆଫ୍ରିକା ଓ ଫ୍ରାନ୍ସ ମଧ୍ୟରେ ଆଜିର ମ୍ୟାଚ୍ ସଙ୍ଘର୍ଷପୂର୍ଣ୍ଣ ରହିଥିଲା । ପ୍ରଥମ କ୍ବାର୍ଟରରୁ ହିଁ ଉଭୟ ଦଳ ମ୍ୟାଚ୍ରେ କଡ଼ା ପ୍ରଦର୍ଶନ କରିଥିଲେ । ଫ୍ରାନ୍ସ ଅଧିନାୟକ ଚାର୍ଲେଟ ଭିକ୍ଟର ପ୍ରଥମ କ୍ବାର୍ଟରରେ ୭ ମିନିଟରେ ମ୍ୟାଚ୍ର ପ୍ରଥମ ଗୋଲ ସ୍କୋର କରିଥିଲେ । ଜବାବରେ ପ୍ରଥମ କ୍ବାର୍ଟରରେ ହିଁ ଦକ୍ଷିଣ ଆଫ୍ରିକା ଦଳ ତରଫରୁ ବିଉଚାମ୍ପ କନ୍ନର ୧୫ ମିନିଟରେ ବିପକ୍ଷ ଦଳ ଉପରେ ଗୋଲ ସ୍କୋର କରିଥିଲେ । ଫଳରେ ଉଭୟ ଦଳ ୧-୧ରେ ବରାବର ସ୍ଥିତିରେ ରହିଥିଲେ ।