ହାଇଦ୍ରାବାଦ: ଫିଫା ବିଶ୍ବକପ ୨୦୨୨ । ଆଜି (ରବିବାର) ଫାଇନାଲ ମୁକାବିଲା । ଡିଫେଣ୍ଡିଂ ଚମ୍ପିଆନ ଫ୍ରାନ୍ସ ଓ ଆର୍ଜେଣ୍ଟିନା ମଧ୍ୟରେ ହେବ କଡା ଟକ୍କର । ଡିଫେଣ୍ଡିଂ ଚମ୍ପିଆନ ଫ୍ରାନ୍ସ ଲଗାତାର ବିଶ୍ବକପ ହାତେଇବା ଲକ୍ଷ୍ୟରେ ମଇଦାନକୁ ଓହ୍ଲାଇବ । ସେପଟେ ୩୬ ବର୍ଷ ହେବ ଟ୍ରଫି ଭୋକିଲା ଥିବା ଆର୍ଜେଣ୍ଟିନା ଟାଇଟଲ ହାତେଇବା ସହ ମେସିଙ୍କୁ ବିଦାୟ ଦେବାର ଆଶା ରଖିବ ।
ଫ୍ୟାନ୍ସଙ୍କ ସମର୍ଥନରେ କମ୍ପିବ କତାର ଲୁସାଇଲ ଷ୍ଟାଡିୟମ । ମଇଦାନରେ ଥିବେ ନାଲି ଓ ଆକାଶିଆ ରଙ୍ଗର ଜର୍ସି ପିନ୍ଧିଥିବା ଦୁଇଦଳ । ସୁନା ପରି ଚିକମିକ କରୁଥିବା ଫିଫା ବିଶ୍ବକପ ଟ୍ରଫି ପାଇଁ ଦୁଇଦଳ ମଧ୍ୟରେ ହେବ ମୁକାବିଲା । ଚଳିତ ଫିଫା ବିଶ୍ବକପ ଅନ୍ତିମ ଚରଣରେ ପହଞ୍ଚିଛି । ଆଜି (ରବିବାର) ଖେଳାଯିବା ଫିଫା ବିଶ୍ବକପର ଫାଇନାଲ ମ୍ୟାଚ । ଆର୍ଜେଣ୍ଟିନା ଓ ଫ୍ରାନ୍ସ ମଧ୍ୟରେ ହେବ ମହାମୁକାବିଲା । ଆର୍ଜେଣ୍ଟିନାର ଏହା ଷଷ୍ଠ ଫାଇନାଲ ମୁକାବିଲା ହୋଇଥିବା ବେଳେ ଫ୍ରାନ୍ସର ଏହା ଚତୁର୍ଥ । କିଏ ମାରିବ ବାଜି ଆଉ ହେବ ଶ୍ରେଷ୍ଠ ଦଳ ତାହାକୁ ଅପେକ୍ଷା ।