ଦୋହା:ଫିଫା ବିଶ୍ବକପ କ୍ବାର୍ଟରରେ ପ୍ରବେଶ କରିଛି 5ଥର ବିଶ୍ବ ଚମ୍ପିଅନ ବ୍ରାଜିଲ । ଦକ୍ଷିଣ କୋରିଆ ବିପକ୍ଷରେ ଏକତରଫା ବିଜୟ ହାସଲ କରି କ୍ବାର୍ଟର ଫାଇନାଲରେ ପ୍ରବେଶ କରିଛି ବ୍ରାଜିଲ । ଭିନିସିଅସ ଜୁନିଅର, ନେୟମାର, ରିଚାରଲିସନ ଏବଂ ପାକ୍ୟୁଟେଙ୍କ ଦମଦାର ପ୍ରଦର୍ଶନ ବଳରେ ରାଉଣ୍ଡ 16 ମ୍ୟାଚରେ ଦକ୍ଷିଣ କୋରିଆକୁ 4-1 ଗୋଲରେ ପରାସ୍ତ କରିଛି ବ୍ରାଜିଲ । ସେପଟେ ଜାପାନକୁ ହରାଇ କ୍ବାର୍ଟରରେ ପ୍ରବେଶ କରିଛି କ୍ରୋଏସିଆ । ଏହାସହ ଫିଫା ବିଶ୍ବରେ ଜାପାନ ଓ ଦକ୍ଷିଣ କୋରିଆର ଅଭିଯାନ ଶେଷ ହୋଇଛି । ଆସନ୍ତା ୯ ତାରିଖରେ କ୍ୱାର୍ଟରରେ ମୁହାଁମୁହିଁ ହେବେ ବ୍ରାଜିଲ-କ୍ରୋଏସିଆ ।
ମ୍ୟାଚ ଆରମ୍ଭରୁ ଫୁଲ ଫର୍ମରେ ଥିଲା ବ୍ରାଜିଲ । ଖେଳ ଆରମ୍ଭର 7 ମିନିଟରେ ପ୍ରଥମ ଗୋଲ କରିଥିଲା ଦଳ । ଭିନିସିଅସ ଜୁନିଅର ପ୍ରଥମ ଗୋଲ ଦେଇ ଦଳକୁ ଆଗୁଆ କରିଥିଲେ । ଗୋଲ ପରିଶୋଧ ପାଇଁ ଦକ୍ଷିଣ କୋରିଆ ପ୍ରସ୍ତୁତ ହେଉଥିବା ବେଳେ ଆଉ ଏକ ଗୋଲ କରିଥିଲା ବ୍ରାଜିଲ । 13ତମ ମିନିଟରେ ବ୍ରାଜିଲକୁ ଏକ ପେନାଲ୍ଟି ମିଳିଥିଲା । ଷ୍ଟ୍ରାଇକର ନେୟମାର ଏହି ପେନାଲ୍ଟିକୁ ଗୋଲରେ ପରିଣତ କରିଥିଲେ । ଦଳ 2-0ରେ ଆଗୁଆ ଥିଲା । ଦକ୍ଷିଣ କୋରିଆ ମ୍ୟାଚକୁ ଫେରିବାକୁ ସଂଘର୍ଷ କରିଥିଲା ମାତ୍ର ବ୍ରାଜିଲ ଆକ୍ରମଣରେ ଦଳକୁ ସଫଳ ମିଳିନଥିଲା । 29ତମ ମିନିଟରେ ଆଉ ଏକ ଗୋଲ ଖାଇଥିଲା ଦକ୍ଷିଣ କୋରିଆ । ପ୍ରଥମ ଅଧଘଣ୍ଟା ଖେଳରେ ବ୍ରାଜିଲ 3-0ରେ ଆଗୁଆ ଥିଲା ।