ଭୁବନେଶ୍ବର: ଦୌଡରାଣୀ ଦୂତି ଚାନ୍ଦ ଇଟାଲିର ନାପୋଲିଠାରେ ଚାଲିଥିବା ୱାର୍ଲ୍ଡ ୟୁନିଭରସିଟି ଗେମ୍ସର 100 ମିଟର ରେସ୍ରେ ସ୍ବର୍ଣ୍ଣ ଆଣିବା ପରେ 200ମିଟର ଇଭେଣ୍ଟରେ ସଫଳତା ଦୋହରାଇବେ ବୋଲି ଆଶା ରଖିଥିଲେ ଓଡିଶାବାସୀ । ମାତ୍ର 200 ମିଟର ଇଭେଣ୍ଟରେ 5ମ ସ୍ଥାନରେ ରହିଥିଲେ ଦୂତି ଚାନ୍ଦ । ଏହାପରେ ଦୂତି 200ମିଟର ଇଭେଣ୍ଟକୁ ନେଇ ନିଜର ପ୍ରତିକ୍ରିୟା ରଖିଛନ୍ତି ।
ସେ 100ମିଟର ଦୌଡରେ ସ୍ବର୍ଣ୍ଣ ପଦକ ହାସଲ କରିଥିବାରୁ ନିଜର ପରିଶ୍ରମ ଫଳ ପାଇଥିବା କହିଛନ୍ତି । ଏଥିସହ ବିଶ୍ବସ୍ତରୀୟ ପ୍ରତିଯୋଗିତାର 200ମିଟର ଫାଇନାଲ ଇଭେଣ୍ଟରେ 5ମ ସ୍ଥାନ ପାଇବା ମଧ୍ୟ ଗର୍ବର କଥା ବୋଲି କହିଛନ୍ତି । କାରଣ ତାଙ୍କର ପର୍ସନାଲ ଇଭେଣ୍ଟ 100ମି. ରହିଥିଲା । ସେହି ଇଭେଣ୍ଟକୁ ବେଶୀ ଫୋକସ୍ ଦେଇଥିଲେ ।
ଆମ ପ୍ରତିନିଧିକୁ ପଠାଯାଇଥିବା ଭିଡିଓ ଦୂତି ନିଜର ପ୍ରତିକ୍ରିୟାରେ କହିଛନ୍ତି ଯେ, 100ମି. ଇଭେଣ୍ଟ ମୋର ମେନ ଫୋକସ୍ ଓ 200ମି. ମୋର ସାଇଟ୍ ଇଭେଣ୍ଟ । 200ମି. ଇଭେଣ୍ଟ ପାଇଁ ଯେତିକି ଫୋକସ୍ କରିଥିଲେ, ତାହାର ସଫଳତା ମଧ୍ୟ ପାଇଛି । ସେମିଫାଇନାଲରେ ଦମ୍ଦାର ଲଢେଇ ହୋଇଥିଲା, ସେଥିରେ 23.24 ସେକେଣ୍ଡ ଦେଇଥିଲି । କିନ୍ତୁ ସେମିଫାଇନାଲର ଏକ ଘଣ୍ଟା ପରେ ଫାଇନାଲ ଇଭେଣ୍ଟ ହେବାରୁ ମୋ ଶରୀର ମୋର ସାଥ୍ ଦେଲା ନାହିଁ, ତେଣୁ ଏତେଟା ଭଲ ପ୍ରଦର୍ଶନ କରି ପାରିଲି ନାହିଁ । ତଥାପି ମୁଁ 5ମ ସ୍ଥାନ ହାସଲ କରିଲି । ବିଶ୍ବସ୍ତରୀୟ ଫାଇନାଲ ପ୍ରତିଯୋଗିତାରେ 5ମ ସ୍ଥାନ ହାସଲ କରିବା ମୋ ପାଇଁ ଗର୍ବର କଥା । ମୁଁ ଭାବୁଛି ଯେ, ଗୋଟେ ଦିନ ପରେ ଫାଇନାଲ ଇଭେଣ୍ଟ ଅନୁଷ୍ଠିତ ହୋଇଥିଲେ ଆହୁରି ଭଲ ପ୍ରଦର୍ଶନ କରି ପଦକ ହାସଲ କରିପାରିଥାନ୍ତି ।
ଏଥିସହ ସେ କହିଛନ୍ତି ଯେ, ଆମେ ଖେଳାଳୀ । ଆମେ ସବୁବେଳେ ପରିଶ୍ରମ କରିଥାଉ । ଦେବା ନେବା ସବୁ ଭଗବାନଙ୍କ ହାତରେ । ମୋତେ ବହୁତ ଖୁସି ଲାଗୁଛି ବିଶ୍ବସ୍ତରରେ ନଂ ଓ୍ବାନ ସ୍ପ୍ରିଣ୍ଟର ହୋଇପାରିଛି । ଦେଶ ଏବଂ ରାଜ୍ୟ ପାଇଁ ସ୍ବର୍ଣ୍ଣ ପଦକ ହାସଲ କରିଛି । 200ମି.ରେ ପଦକ ହାସଲ କରିପାରି ନାହିଁ କିନ୍ତୁ ଏହି ସିଜନର ବେଷ୍ଟ ପ୍ରଦର୍ଶନ କରିଛି । ଆପଣମାନଙ୍କ ଭଲ ପାଇବା ଓ ଆର୍ଶୀବାଦ ଥିଲେ ଆଗାମୀ ଦିନରେ ମେଗା ଇଭେଣ୍ଟମାନଙ୍କରେ ଭଲ ପ୍ରଦର୍ଶନ କରି ଦେଶ ପାଇଁ ଗୌରବ ଅର୍ଜନ କରିବି ।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
