ନୂଆଦିଲ୍ଲୀ: ଡେନମାର୍କ୍ ଓପନ ସୁପର 750 ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟରେ ପିଭି ସିନ୍ଧୁଙ୍କୁ ନିରାଶ ହେବାକୁ ପଡ଼ିଛି । ଆର୍କଟିକ୍ ଓପନ୍ ପରେ ଡ଼େନମାର୍କ ଓପନ୍ ସେମିରେ ପରାସ୍ତ ହୋଇଛନ୍ତି ଦୁଇ ଥର ଅଲମ୍ପିକ୍ସ ପଦକ ବିଜୟିନୀ ଭାରତୀୟ ଷ୍ଟାର ସଟଲର ପିଭି ସିନ୍ଧୁ । ଫଳରେ ଫାଇନାଲ ଖେଳିବା ସ୍ବପ୍ନ ଅଧାରେ ରହିଛି । ସେମିଫାଇନାଲରେ ସ୍ପେନ୍ର କାରୋଲିନାଙ୍କଠୁ ପରାସ୍ତ ହୋଇ ଅଭିଯାନ ଶେଷ କରିଛନ୍ତି ପିଭି ସନ୍ଧୁ ।
ମହିଳା ଏକକ ସେମିଫାଇନାଲରେ ସିନ୍ଧୁ ସ୍ପେନର କାରୋଲିନା ମାରିନଙ୍କଠୁ 18-21, 21-19, 7-21 ସେଟରେ ପରାସ୍ତ ହୋଇଥିଲେ । ଏହି ମ୍ୟାଚ 1 ଘଣ୍ଟା 13 ମିନିଟ ଧରି ଚାଲିଥିଲା । ପ୍ରଥମ ଗେମରେ ପରାସ୍ତ ହୋଇଥିଲେ ବି ଦ୍ବିତୀୟ ଗେମ୍ ଜିତିଥିଲେ ପିଭି ସିନ୍ଧୁ । ତୃତୀୟ ଗେମରେ ପରାସ୍ତ ହୋଇଥିଲେ । ଦୁଇଥର ଅଲମ୍ପିକ୍ସ ପଦକ ବିଜେତା ପିଭି ସିନ୍ଧୁଙ୍କୁ ପୁଣି ଥରେ ସେମିଫାଇନାଲରୁ ଅଭିଯାନ ଶେଷ କରିବାକୁ ପଡିଛି । ଏହି ଦୁଇ ଖେଳାଳି ପରସ୍ପରକୁ 16 ଥର ଭେଟିଛନ୍ତି । ସିନ୍ଧୁ 5-11 ପଛୁଆ ରହିଛନ୍ତି ।
ଗତ 17 ତାରିଖରୁ ଓଡେନସେରେ ଡେନମାର୍କ ଓପନ ଆରମ୍ଭ ହୋଇଥିଲା । ଏଥିରେ ବଜିୟରୁ ଅଭିଯାନ ଆରମ୍ଭ କରିଥିଲେ ଦୁଇଥରର ଅଲିମ୍ପିକ୍ସ ପଦକ ବିଜୟିନୀ ପିଭି ସିନ୍ଧୁ । ମହିଳା ଏକକ ରାଉଣ୍ଡ-32ରେ ଏକ ମୁକାବିଲାରେ ସିନ୍ଧୁ 21-14,18-21,21-10 ଗେମରେ ବିଶ୍ବ ମାନ୍ୟତାର 28ତମ ସ୍ଥାନରେ ଥିବା ସ୍କଟଲାଣ୍ଡର କିର୍ଷ୍ଟି ଗିଲମୋରଙ୍କୁ ପରାସ୍ତ କରି ପ୍ରି-କ୍ବାର୍ଟରରେ ପ୍ରବେଶ କରିଥିଲେ । ପ୍ରି-କ୍ବାର୍ଟରରେ ଜର୍ଜିଆର ମାରିସ୍କୋ ତଜଙ୍ଗଙ୍କୁ ପରାସ୍ତ କରିଥିଲେ । ଏହା ପରେ ମହିଳା ବର୍ଗ ପ୍ରି କ୍ବାର୍ଟରରେ ସିନ୍ଧୁ 18-21, 21-15, 21-13 ଗେମରେ ବିଡବ୍ଲ୍ୟୁଏଫ ମାନ୍ୟତା ତାଲିକାରେ ସପ୍ତମ ସ୍ଥାନରେ ଥିବା ଇଣ୍ଡୋନେସିଆର ଗ୍ରେଗେରିଆ ମାରିସ୍କା ତୁନଜୁଙ୍କଙ୍କୁ ପରାସ୍ତ କରି କ୍ବାର୍ଟର ଫାଇନାରେ ପ୍ରବେଶ କରିଥିଲେ । କ୍ବାର୍ଟର ରାଉଣ୍ଡରେ ଥାଇଲାଣ୍ଡର ସୁପନିଦା କାଟେଥୋଙ୍ଗଙ୍କୁ ପରାସ୍ତ କରି ସେମିଫାଇନାଲରେ ପ୍ରବେଶ କରିଥିଲେ । ମାତ୍ର ଆର୍କଟିକ ଓପନ ପରି ଡ଼େନମାର୍କ ଓପନରେ ମଧ୍ୟ ନିରାଶ ହୋଇଛନ୍ତି ସିନ୍ଧୁ । ସେମିରୁ ସିନ୍ଧୁଙ୍କ ଅଭିଯାନ ଶେଷ ହୋଇଛି ।