ଶେନଝେନ(ଚୀନ): ସେମି ଫାଇନାଲରେ ଦମଦାର ପ୍ରଦର୍ଶନ କରି ଫାଇନାଲରେ ପ୍ରବେଶ କରିଥିବା ଭାରତୀୟ ବ୍ୟାଡମିଣ୍ଟନ ଯୋଡ଼ି ସାତ୍ତ୍ବିକ-ଚିରାଗ ଫାଇନାଲରେ ବିଫଳ ହୋଇଛନ୍ତି । ଚୀନରେ ଚାଲିଥିବା ଚାଇନା ମାଷ୍ଚର୍ସ ସୁପର 750 ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟରେ ଭାରତର ସାତ୍ତ୍ବିକ ଚିରାଗ ଯୋଡି ଫାଇନାଲରେ ପରାସ୍ତ ହୋଇ ରନର୍ସଅପ ହୋଇଛନ୍ତି । ରବିବାର ଅନୁଷ୍ଠିତ ଫାଇନାଲରେ ଭାରତୀୟ ଯୋଡ଼ି 19-21,21-18,19-21 ଗେମରେ ବିଶ୍ବର ଏକ ନମ୍ବର ଯୋଡ଼ି ଲିୟାଙ୍ଗ ୱେଲ୍ କେଙ୍ଗ ଓ ୱାଙ୍ଗ ଚାଙ୍ଗଙ୍କ ନିକଟରୁ ହାରି ଯାଇଥିଲେ । ଫଳରେ ଉପବିଜେତାରେ ସନ୍ତୁଷ୍ଟ ହୋଇଛନ୍ତି ଏହି ଯୋଡ଼ି ।
ଏହି ଫାଇନାଲ ମ୍ୟାଚ ଜିତିବାକୁ ଚୀନ ଯୋଡିଙ୍କୁ 71ମିନିଟ ସମୟ ଲାଗିଥିଲା । ସାତ୍ତ୍ବିକ-ଚିରାଗ ଯୋଡି ଲଢ଼ୁଆ ପ୍ରଦର୍ଶନ କରିବା ସର୍ତ୍ତ୍ବେ ଅଳ୍ପକେ କ୍ୟାରିୟରର ଦ୍ବିତୀୟ ସୁପର 750 ଟାଇଟଲ ହାତେଇବାକୁ ବଞ୍ଚିତ ହୋଇଥିଲେ । ପ୍ରଥମ ଗେମରେ ପରାସ୍ତ ହେବା ପରେ ଦ୍ବିତୀୟ ଗେମରେ ଜବରଦସ୍ତ କମବ୍ୟାକ କରିଥିଲେ । ଭାରତୀୟ ଯୋଡି ଚଳିତ ସିଜନରେ ଏସିଆ ଚମ୍ପିଆନସିପସ, ଇଣ୍ଡୋନେସିଆ ସୁପର 1000, ସ୍ବିସ୍ ଓପନ ଓ ଏସୀୟ କ୍ରୀଡ଼ାରେ ଚମ୍ପିଆନ ହେବାର ଗୌରବ ଲାଭ କରିଥିଲେ । ଚଳିତ ସିଜନରେ ସାତ୍ତ୍ବିକ-ଚିରାଗ ପ୍ରଥମ ଥର ଲାଗି କୌଣସି ଟୁର୍ଣ୍ଣାମେଣ୍ଟର ଫାଇନାଲରେ ପରାସ୍ତ ହୋଇଛନ୍ତି । ପୂର୍ବରୁ 6ଟି ଟୁର୍ଣ୍ଣାମେଣ୍ଟର ଫାଇନାଲରେ ବିଜୟୀ ହୋଇଥିଲେ ।
ଏହା ବି ପଢନ୍ତୁ...ଚାଇନା ମାଷ୍ଟର୍ସ ବ୍ୟାଡମିଣ୍ଟନ; ଫାଇନାଲରେ ସାତ୍ତ୍ବିକ-ଚିରାଗ