ନୂଆଦିଲ୍ଲୀ:ଏସୀୟ କ୍ରୀଡ଼ା ହକି ଭାରତୀୟ ହକି ଦଳର ଧମାକାଦାର ପ୍ରଦର୍ଶନ । ଲଗାତାର ଦ୍ବିତୀୟ ବିଜୟ ହାସଲ କରିଛି ଭାରତୀୟ ହକି ଦଳ । ଗ୍ରୁପ ପର୍ଯ୍ୟାୟ ମ୍ୟାଚରେ ଆଜି ସିଙ୍ଗାପୁର ଓ ଭାରତ ମଧ୍ୟରେ ମୁକାବିଲା ରହିଥିଲା । ଏହି ମ୍ୟାଚରେ ଅଧିପତ୍ୟ ବିସ୍ତାର କରି ବିରାଟ ବିଜୟ ହାସଲ କରିଛି ହର୍ମନପ୍ରୀତ ସିଂହଙ୍କ ନେତୃତ୍ବାଧୀନ ଭାରତୀୟ ହକି ଦଳ । 16-1 ଗୋଲରେ ସିଙ୍ଗାପୁରକୁ ପରାସ୍ତ କରିଛି । ଏହି ମ୍ୟାଚରେ ଅଧିନାୟକ ହର୍ମନପ୍ରୀତ ସିଂହ 4ଟି ଗୋଲ କରିଥିବାବେଳେ ମନଦୀପ ହ୍ୟାଟ୍ରିକ ଗୋଲ କରିଛନ୍ତି ।
ମ୍ୟାଚ୍ରେ ଆରମ୍ଭରୁ ଶେଷ ଯାଏଁ ଆଧିପତ୍ୟ ବିସ୍ତାର କରିଥିବା ଭାରତ । ବ୍ୟାକ୍ ଟୁ ବ୍ୟାକ୍ ଗୋଲ୍ ସ୍କୋର କରିଥିଲେ ହକି ଷ୍ଟାର । ହାଫ୍ ଟାଇମ୍ ସୁଦ୍ଧା 6-0ରେ ଆଗୁଆ ରହିଥିଲା ଭାରତ । ଗୋଟିଏ ପରେ ଗୋଟିଏ ଗୋଲ୍ କରି ଚାଲିଥିଲେ ଭାରତୀୟ ହକି ତାରକା । ଖାତା ଖୋଲିବାକୁ ସୁଯୋଗ ଖୋଜୁଥିବା ସିଙ୍ଗାପୁର ବିଫଳ ହୋଇଥିଲା । ମ୍ୟାଚରେ 12ତମ, 30 ଓ 51ତମ ମିନିଟରେ ମନଦୀପ ସିଂହ 3ଟି ଗୋଲ କରିଥିଲେ । 16ତମ ମିନିଟରେ ଲଳିତ କୁମାର ଗୋଟିଏ ଗୋଲ କରିଥିବା ବେଳେ 22ତମ ମିନିଟରେ ଗୁରଜିତ ସିଂ ଗୋଟିଏ ଗୋଲ କରିଥିଲେ ।
23 ତମ ମିନିଟରେ ବିବେକ ସାଗର ପ୍ରସାଦ ଓ 24, 29, 40 ଓ 42ତମ ମିନିଟରେ ଅଧିନାୟକ ହର୍ମନପ୍ରୀତ ସିଂହ 4ଟି ଗୋଲ୍ ସ୍କୋର୍ କରିଥିଲେ । ସେହିପରି 37ତମ ମିନିଟରେ ମନପ୍ରୀତ ସିଂହ, 38ତମ ମିନିଟରେ ସମଶେର ସିଂହ, 51 ଓ 52 ତମ ମିନିଟରେ ଅଭିଷେକ ଦୁଇଟି ଗୋଲ କରିଥିଲେ । 53 ଓ 55ତମ ମିନିଟରେ ବରୁଣ କୁମାର ଶେଷ ଗୋଲ କରିଥିଲେ । ସିଙ୍ଗାପୁର ଗୋଟିଏ ଗୋଲ ପରିଶୋଧ କରିଥିଲା ।