ନୂଆଦିଲ୍ଲୀ:ଆରମ୍ଭ ହୋଇସାରିଛି ଟୋକିଓ ଅଲମ୍ପିକ୍ସ ପାଇଁ କାଉଣ୍ଟଡାଉନ । ଭାରତୀୟ ଅଲମ୍ପିକ ଟିମ ଟୋକିଓ ଅଭିମୁଖେ କିଛିଦିନ ମଧ୍ୟରେ ଉଡାଣ ଭରିବ । ଏହା ପୂର୍ବରୁ ଖେଳାଳିଙ୍କ ପାଇଁ ସମସ୍ତ ଆବଶ୍ୟକୀୟ ବ୍ୟବସ୍ଥା ସଠିକ ଢଙ୍ଗରେ କରିବାକୁ ଭାରତ ସରକାରଙ୍କ କ୍ରୀଡା ମନ୍ତ୍ରଣାଳୟ ପ୍ରସ୍ତୁତ ହେଉଛି । ଏହି କ୍ରମରେ ଭାରତୀୟ ଅଲମ୍ପିକ ଆସୋସିଏସନ ସଭାପତି ନରିନ୍ଦର ବାତ୍ରା ସୋମବାର କେନ୍ଦ୍ର କ୍ରୀଡା ମନ୍ତ୍ରୀ ଅନୁରାଗ ଠାକୁରଙ୍କୁ ଭେଟିଛନ୍ତି । ଏଥିସହ ଅଲମ୍ପିକ ଯୋଗ୍ୟ ଆଥଲେଟଙ୍କ ପ୍ରସ୍ତୁତି ନେଇ ମନ୍ତ୍ରୀଙ୍କୁ ଅବଗତ କରାଇଛନ୍ତି ।
ଭାରତୀୟ ଅଲମ୍ପିକ ଆଥଲେଟ ଓ ଅଧିକାରୀଙ୍କ ଟିକାକରଣ, ଯାତ୍ରା ଓ ଭାରତୀୟ ଖେଳାଳିଙ୍କ ରହଣୀ ବନ୍ଦୋବସ୍ତ ନେଇ ସମସ୍ତ ପ୍ରସ୍ତୁତି ଭଲଭାବେ ହେବା ନେଇ ମନ୍ତ୍ରୀ ଜଣାଇଛନ୍ତି । ଜୁଲାଇ 17ରେ ପ୍ରଥମ ଦଫା ଭାରତୀୟ ଅଲମ୍ପିକ ଟିମ ଟୋକିଓ ଅଭିମୁଖେ ଦିଲ୍ଲୀ ବିମାନବନ୍ଦରରୁ ଉଡାଣ ଭରିବ । ଦେଶ ତମାମ ଅଲମ୍ପିକ ଫିଭର ବଢିବାରେ ଲାଗିଥିବାରୁ ବିମାନବନ୍ଦରରେ ଉଚିତ ବ୍ୟବସ୍ଥା ନେଇ ମଧ୍ୟ ସମୀକ୍ଷା କରିଛନ୍ତି । ଏନେଇ ବାତ୍ରା ଏକ ଅଫିସିଆଲ ବିବୃତିରେ ଜଣାଇଛନ୍ତି ।