ଭୁବନେଶ୍ବର:ଷ୍ଟାର ପାରା-ଆଥଲେଟ ଜୟନ୍ତୀ ବେହେରାଙ୍କୁ ମିଳିଲା ବିଜୁ ପଟ୍ଟନାୟକ କ୍ରୀଡା ପୁରସ୍କାର । କ୍ରୀଡା କ୍ଷେତ୍ରରେ ପ୍ରଭାବୀ ପ୍ରଦର୍ଶନ ପାଇଁ ରାଜ୍ୟ ସରକାରଙ୍କ ପକ୍ଷରୁ ପୁରସ୍କାର ପ୍ରଦାନ କରାଯାଇଥାଏ । ଅଗଷ୍ଟ 29 ଜାତୀୟ କ୍ରୀଡା ଦିବସ ଅବସରରେ ଏହି ପୁରସ୍କାର ପ୍ରଦାନ ପାଇଁ ରାଜ୍ୟ କ୍ରୀଡା ବିଭାଗ ପକ୍ଷରୁ ଘୋଷଣା ହୋଇଥିଲା । ୨୦୧୯ ବର୍ଷରେ ଜୟନ୍ତୀଙ୍କ ଶ୍ରେଷ୍ଠ ପ୍ରଦର୍ଶନ ରହିଛି । ଏନେଇ ସୂଚନା ଦେଇଥିଲେ କ୍ରୀଡ଼ା ଓ ଯୁବ ବ୍ୟାପାର ସଚିବ ବିଶାଳ ଦେବ ।
ରାଜ୍ୟର ଶ୍ରେଷ୍ଠ ଦଶ ଜଣ ପାରା-ଆଥଲେଟସ୍ ଭାବେ ଓଡିଶାର ପୁରୀ ଜିଲ୍ଲା ସତ୍ୟବାଦୀର ଦୌଡରାଣୀ ଜୟନ୍ତୀ ବେହେରା ଚୟନ କମିଟି ଦ୍ୱାରା ମନୋନୀତ ହୋଇଥିଲେ । ଓଡିଶାର ପ୍ରଥମ ପାରା-ଆଥଲେଟ ଭାବେ ମଧ୍ୟ ପରିଚିତ ଜୟନ୍ତୀ । ଏଯାବତ ସେ ୧୨ଟି ଜାତୀୟ ଓ ୯ଟି ଅନ୍ତର୍ଜାତୀୟ ସ୍ତରର ପଦକ ପାଇଛନ୍ତି ଜୟନ୍ତୀ ।
ଜୟନ୍ତୀ 2018 ମସିହାରେ ଜାତୀୟ ପାରା-ଆଥଲେଟ ଚମ୍ପିଆନସିପ ପ୍ରଥମ ହେବା ସହ ସ୍ବର୍ଣ୍ଣ ପଦକ ହାସଲ କରିଥିଲେ । ଏହା ସହ ୱାର୍ଲଡ ୟୁଥ ଚମ୍ପିଆନସିପ ପ୍ରତିଯୋଗିତାରେ 200 ମିଟର, 400 ମିଟର ଏବଂ 800 ମିଟରରେ ଦୌଡ଼ରେ ଭାଗନେଇ ସଫଳତା ହାସଲ କରିଥିଲେ । କେବଳ ଏତିକି ନୁହେଁ ଅନେକ ଜାତୀୟ ଓ ଅନ୍ତଜାତୀୟ କ୍ରୀଡାରେ ଅଂଶଗ୍ରହଣ କରି ଦେଶ ଏବଂ ରାଜ୍ୟ ପାଇଁ ଗୌରବାନ୍ନିତ କରିଛନ୍ତି ।