ଭୋପାଳ: ପ୍ରଥମ ହକି ଇଣ୍ଡିଆ ସବ୍-ଜୁନିଅର ପୁରୁଷ ଏକାଡେମୀ ନ୍ୟାସନାଲ ଚମ୍ପିଆନସିପ୍ ୨୦୨୧ରେ ଓଡିଶାର ବିଜୟ ଯାତ୍ରା ଜାରି ରହିଛି । କ୍ବାର୍ଟର-ଫାଇନାଲ ମୁକାବିଲାରେ ବାଦିପତି ରାଜା ହକି ଏକାଡେମୀକୁ ହରାଇ ସେମିଫାଇନାଲରେ ପ୍ରବେଶ କରିଛି ଓଡିଶା ନାଭାଲ ଟାଟା ହକି ହାଇ-ପର୍ଫମାନ୍ସ ସେଣ୍ଟର । କ୍ବାର୍ଟର ମୁକାବିଲାରେ ଲଢୁଆ ପ୍ରଦର୍ଶନ ସହ ୧୦-୦ ବ୍ୟବଧାନରେ ଏକତରଫା ବିଜୟ ହାସଲ କରିଛି ଓଡିଶା ।
ମ୍ୟାଚ୍ ଆରମ୍ଭରୁ ଆକ୍ରମଣାତ୍ମକ ରଣନୀତି ନେଇ ଖେଳିଥିଲା ଓଡିଶା ନାଭାଲ ଟାଟା । ଓଡିଶା ପକ୍ଷରୁ ପ୍ରେମଦୟାଲ ଗିରି ମ୍ୟାଚର ତୃତୀୟ ମିନିଟରେ ଗୋଲ୍ ସ୍କୋର କରିଥିଲେ । ଏହାପରେ ୧୬ତମ ଓଭରରେ ଆଉ ଏକ ଚମତ୍କାର ଗୋଲ୍ ମଧ୍ୟ କରିଥିଲେ । ୟୁମଖାମ ବିଦ୍ୟାନନ୍ଦ ସିଂହ(୩୦' ୪୨') ମଧ୍ୟ ଦୁଇଟି ଗୋଲ୍ କରିଥିଲେ । ସେହିପରି ରେଙ୍ଗବାମ ରୋହିତ ସିଂ(୧୧'), ଆରୟନ ସେସ୍(୧୮'), ପ୍ରିତମ ଏକ୍କା(୨୩'), ଆକାଶ ଯାଦବ(୨୭'), ରିକି ତୋଞ୍ଜାମ(୨୯') ଓ ୟୋଜିନ ମିଞ୍ଜ(୪୮') ମିନିଟରେ ଗୋଲ୍ ସ୍କୋର କରିଥିଲେ ।