ହାଇଦ୍ରାବାଦ: ଅନେକ ବିଶ୍ବସ୍ତରୀୟ କ୍ରୀଡା ଇଭେଣ୍ଟ ସଫଳତାର ସହ ଆୟୋଜନ କରିଛନ୍ତି ଓଡିଶା ସରକାର । ତେବେ କ୍ରୀଡା ତାଲିମକୁ ଅଧିକ ଗୁରୁତ୍ବ ଦେଉଛନ୍ତି ସରକାର । ହକି ତାଲିମ ପାଇଁ ଆଉ ପାଦେ ଆଗେଇଛନ୍ତି ଓଡିଶା ସରକାର ।
ତୃଣମୂଳ ସ୍ତରରେ କ୍ରୀଡାପ୍ରତିଭାଙ୍କୁ ଉପଯୁକ୍ତ ତାଲିମ ଯୋଗାଇଦେବାକୁ ଭିତ୍ତିଭୂମି ପ୍ରସ୍ତୁତ ସହ ରାଜ୍ୟକୁ କ୍ରୀଡାର ହବ୍ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଯୋଜନା ରହିଛି । ଏହି କ୍ରମରେ ଶୁକ୍ରବାର ଦେଓଗଡ ଓ ଢେଙ୍କାନାଳରେ ବାଳକ ରେସିଡେଣ୍ଟ ପ୍ରୋଗ୍ରାମର ଉଦ୍ଘାଟନ କରିଛନ୍ତି କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା ।
ଓଡିଶା ନାଭାଲ ଟାଟା ଉଚ୍ଚ ପ୍ରଦର୍ଶନ ସେଣ୍ଟର ଏହାର ରକ୍ଷଣାବେକ୍ଷଣ ଦାୟିତ୍ବରେ ରହିଛି । ପ୍ରଥମ ପର୍ଯ୍ୟାୟରେ ମୋଟ 31 ଜଣ ଖେଳାଳି ଚୟନ ହୋଇଥିବାବେଳେ ସେଥିମଧ୍ୟରୁ 21ଜଣ କେବଳ ଓଡିଶାରୁ ରହିଛନ୍ତି । ଅବଶିଷ୍ଟ ଖେଳାଳି ଆସାମ ଓ ମଣିପୁରର ରହିଥିବା ମନ୍ତ୍ରୀ ସୂଚନା ଦେଇଛନ୍ତି ।
କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା, ଏହି ତାଲିମ କେନ୍ଦ୍ରକୁ ଉଦ୍ଘାଟନ କରିବା ସହ ଭାବୁକ ହେବାର ଦେଖାଯାଇଥିଲେ । ଯୁବ ପ୍ରତିଭାବାନ କ୍ରୀଡାବିତଙ୍କୁ ଉପଯୁକ୍ତ ତାଲିମ ମାଧ୍ୟମରେ ଦକ୍ଷ କରିବାକୁ ମୁଖ୍ୟମନ୍ତ୍ରୀଙ୍କ ସ୍ବପ୍ନ ରହିଛି । ଏଥିପାଇଁ ଅନେକ କାର୍ଯ୍ୟକ୍ରମ ଚାଲୁ ରହିଥିବା କହିଛନ୍ତି କ୍ରୀଡାମନ୍ତ୍ରୀ । ତାଲିମ ପାଇଁ ଚୟନ ହୋଇଥିବା ସମସ୍ତ ଖେଳାଳିଙ୍କୁ ଶୁଭେଚ୍ଛା ଜଣାଇବା ସହ ଭବିଷ୍ୟତରେ ଜାତୀୟ ଦଳରୁ ପ୍ରତିନିଧିତ୍ବ କରିବାକୁ ଶୁଭକାମନା ଜଣାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
