ମାଲେସିଆ: ଇପୋହରେ ଚାଲିଥିବା 28ତମ ସୁଲତାନ ଆଜଲାନ ଶାହ କପ ହକିରେ ଭାରତ 2ୟ ମ୍ୟାଚ ଡ୍ର ରଖିଛି । ବିଜୟରୁ ଅଭିଯାନ ଆରମ୍ଭ କରିଥିବା ଭାରତ ଦ୍ବିତୀୟ ମ୍ୟାଚରେ ଦକ୍ଷିଣ କୋରିଆ ସହ 1-1 ଗୋଲରେ ଡ୍ର ରଖିଛି । ତେବେ ଶେଷ ମିନିଟ୍ରେ ଗୋଲ ବରଣ ଦଳ ପାଇଁ କାଳ ସାଜିଛି ।
ଶନିବାର ପ୍ରଥମ ମ୍ୟାଚରେ ଜାପାନକୁ ହରାଇଥିବା ଭାରତ ରବିବାର ଦ୍ବିତୀୟ ମ୍ୟାଚରେ ଦକ୍ଷିଣ କୋରିଆ ସହ ମୁକାବିଲା କରିଥିଲା । ତେବେ ଶେଷ ମିନିଟରେ ଗୋଲ ବରଣ ଲଗାତାର ଦ୍ବିତୀୟ ବିଜୟରୁ ବଞ୍ଚିତ କଲା । ଏହି ମ୍ୟାଚରେ ବର୍ଷା ବାଧକ ସାଜିଥିଲା । ଭାରତ ପରବର୍ତ୍ତୀ ମ୍ୟାଚ ୨୬ ତାରିଖରେ ଆୟୋଜକ ମାଲେସିଆକୁ ଭେଟିବ ।
ଆରମ୍ଭରୁ ଭାରତ ପ୍ରଭାବ ବିସ୍ତାର କରି ଖେଳ ଆରମ୍ଭ କରିଥିଲା ।କୋରିଆ ମଧ୍ୟ ଭାରତ ଉପରେ ଚାପ ପକାଇବାକୁ ଜୋରଦାର ପ୍ରୟାସ କରିଥିଲା ।ଉଭୟ ଦଳ ମଧ୍ୟରେ ତୀବ୍ର ସଂଘର୍ଷ ଜାରି ରହିଥିବା ବେଳେ ୨୮ ମିନିଟ୍ରେ ମନଦୀପ୍ ସିଂହଙ୍କ ଫିଲ୍ଡ ଗୋଲ ବଳରେ ଭାରତ ଆଗୁ୍ଆ ହୋଇଥିଲା । ଏହାପରେ ପ୍ରଥମାର୍ଦ୍ଧରେ ଉଭୟ ଦଳ ଏକାଧିକ ପେନାଲଟି କର୍ଣ୍ଣର ପାଇଥିଲେ ମଧ୍ୟ ଗୋଲ କରିବାରେ ସମର୍ଥ ହୋଇନଥିଲେ ।
ତେବେ ମ୍ୟାଚ ଶେଷ ହେବାକୁ ୮ ମିନିଟ୍ ବାକି ଥିବାବେଳେ ପ୍ରବଳ ବର୍ଷା ଯୋଗୁଁ ଖେଳ ସ୍ଥଗିତ ରଖାଯାଇଥିଲା । ବର୍ଷା ଛାଡିବା ପରେ ଖେଳ ପୁଣି ଆରମ୍ଭ ହୋଇଥିଲା । ଏଥିରେ କୋରିଆ ଲଗାତାର ପେନାଲଟି କର୍ଣ୍ଣର ପାଇଥିଲେ ମଧ୍ୟ ଗୋଲ ଦେଇପାରିନଥିଲା ।
ତେବେ ଶେଷ ମୂହୁର୍ତ୍ତରେ କୋରିଆ ଗୋଲ ସୁଝିବାରେ ସମର୍ଥ ହୋଇଥିଲା । ୫୯ ମିନିଟ୍ରେ କୋରିଆକୁ ମିଳିଥିଲା ଆଉ ଏକ ପେନାଲଟି କର୍ଣ୍ଣର । ଜଙ୍ଗ୍ହ୍ୟୁନ୍ ଜାଙ୍ଗ୍ଙ୍କ ଶକ୍ତିଶାଳୀ ଡ୍ରାଗ ଫ୍ଲିକ୍କୁ ଅଭିଜ୍ଞ ଗୋଲରକ୍ଷକ ପିଆର ଶ୍ରୀଜେସଅଟକାଇ ଦେଇଥିଲେ । କିନ୍ତୁ ସେହି ମିନିଟ୍ରେ କୋରିଆ ଆଉ ଏକ ପେନାଲଟି କର୍ଣ୍ଣର ପାଇଥିଲା । ଯାହାକୁ ଜଙ୍ଗ୍ହ୍ୟୁନ୍ ଜାଙ୍ଗ୍ ଗୋଲରେ ପରିଣତ କରିଥିଲେ । ଏହାସହ ମ୍ୟାଚ 1-1ରେ ଡ୍ର ରହିଥିଲା ।
