ସୁବର୍ଣ୍ଣପୁରରେ ହକିର ଭୀଷ୍ମ ପିତାମହ ବଅସ ଗୁଡ଼ିଆ, ଷ୍ଟାଡିୟମ ପାଇଁ କଲେ ଦାବି

ସୁବର୍ଣ୍ଣପୁରରେ ହକି ଷ୍ଟାଡିୟମ ପାଇଁ ଦାବି । ହକିର ପିତାମହ ଭୀଷ୍ମ କୁହାଯାଉଥିବା ବଅସ ଗୁଡିଆ ସ୍ଥାନୀୟ ଅଞ୍ଚଳରେ ଏକ ଷ୍ଟାଡିୟମ ପାଇଁ ଦାବି କରିଛନ୍ତି । ଅଧିକ ପଢନ୍ତୁ...

ସୁବର୍ଣ୍ଣପୁର: ଜିଲ୍ଲାର ହକି ଖେଳର ଭୀଷ୍ମ ପିତାମହ ବଅସ ଗୁଡିଆ । ଘର ଉଲୁଣ୍ଡା ବ୍ଲକ ମାଟୁ ପାଲି ଗାଁରେ, ବୟସ ପ୍ରାୟ 70 ବର୍ଷ ।ହେଲେ ଆଜି ବି ହକି ଖେଳ ପାଇଁ ତାଙ୍କ ଶରୀର ଓ ମନରେ ଅଛି ଶତ ବଳ । ସ୍ଥାନୀୟ ଅଞ୍ଚଳର ଯୁବପିଢିଙ୍କୁ ମଧ୍ୟ ଯୋଗାଇଛନ୍ତି ପ୍ରେରଣା । ହକିର ପିତାମହ ଭୀଷ୍ମ କୁହାଯାଉଥିବା ବଅସ ଗୁଡିଆ ସ୍ଥାନୀୟ ଅଞ୍ଚଳରେ ଏକ ଷ୍ଟାଡିୟମ ପାଇଁ ଦାବି କରିଛନ୍ତି ।

ତେବେ ବଅସ ଗୁଡିଆ ଦୀର୍ଘ 23 ବର୍ଷ ହେବ ଉଲୁଣ୍ଡା ବ୍ଲକର ଚଡେଇପଙ୍କ, ଯଉଁରାଭଉଁରା, ସିଣ୍ଢୋଲ ଆଦି ପଞ୍ଚାୟତର ପ୍ରାୟ 22 ଖଣ୍ଡ ଗାଁର ଯୁବକମାନଙ୍କୁ ହକି ଖେଳ ଶିକ୍ଷାଛନ୍ତି । ସୁନ୍ଦରଗଡ ଜିଲ୍ଲାରୁ ହଜାର ହଜାର ଆଦିବାସୀ ସମ୍ପ୍ରଦାୟର ଲୋକେ ଉଲୁଣ୍ଡା ବ୍ଳକ ଅଞ୍ଚଳକୁ ଆସି ବସବାସ କରିବା ପରେ ଜିଲ୍ଲାରେ ହକି ଆରମ୍ଭ ହୋଇଥିଲା । ବଅସ ଗୁଡିଆ ବଙ୍କା ବାଉଁଶ ବାଡିକୁ ନେଇ ହକିଷ୍ଟିକ ତିଆରି କରି ପିଲାମାନଙ୍କୁ ହକି ଶିକ୍ଷାଇବା ଆରମ୍ଭ କରିଥିଲେ । ବର୍ତ୍ତମାନ ସୁଦ୍ଧା ସେ ଅଞ୍ଚଳରେ ପ୍ରାୟ 22 ଟି ହକିଟିମ ତିଆରି କରିପାରିଛନ୍ତି ।

ବିଜୟୀ ଟିମକୁ କୁକୁଡା, ଖାସି ଆଦି ପୁରଷ୍କାର ଦେଇ ଆରମ୍ଭ କରିଥିଲେ ହକି ଟୁର୍ଣ୍ଣାମେଣ୍ଟ, ଯାହା ଆଜି ସ୍ଥାନୀୟ ଅଞ୍ଚଳରେ ପରିବ୍ୟାପ୍ତ ହୋଇଛି । ଏପରିକି ନିଜ ଗାଁ ମାଟୁପାଲିର ଆଖପାଖ ଗାଁର ଝିଅମାନଙ୍କୁ ନେଇ ୨ଟି ହକି ଦଳ ଗଠନ କରିଛନ୍ତି । ବୟସର ସାୟାହ୍ନରେ ମଧ୍ୟ ସେ ହକି ପାଇଁ ନିଜକୁ ସମର୍ପିତ କରିଛନ୍ତି । ଏଥିପାଇଁ ଜିଲ୍ଲା ହକି ଆସୋସିଏସନ ତାଙ୍କୁ ହକି ଟୁର୍ଣ୍ଣାମେଣ୍ଟରେ ସମ୍ମାନିତ କରିବା ପରେ ଗଣମାଧ୍ୟମର ଦୃଷ୍ଟିକୁ ଆସିଛନ୍ତି ହକିର ଭୀଷ୍ମ ପିତାମହ ବଅସ ଗୁଡିଆ ।

ତେବେ ଏହିଅବସରରେ ବଅସ ଗୁଡିଆ ନିଜସ୍ବ ଉଦ୍ୟମରେ ଦକ୍ଷିଣିପାଲି ଗାଁରେ ତିଆରି କରିଥିବା ଏକ ପଡିଆକୁ ଷ୍ଟାଡିୟମରେ ପରିଣତ କିରବାକୁ ସରକାରଙ୍କ ନିକଟରେ ଦାବି କରିଛନ୍ତି ।

ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ