ରିଓ ଦେ ଜାନିଏରୋ: ଇତିହାସ ରଚିଲେ ବିଶ୍ବ ଫୁଟବଲର ଅନ୍ୟତମ ଶ୍ରେଷ୍ଠ ଫୁଟବଲ ଖେଳାଳି ଲିଓନେଲ ମେସି । ଦୀର୍ଘ 28 ବର୍ଷ ପରେ ବ୍ରାଜିଲକୁ ହରାଇ କୋପା ଆମେରିକା ଟାଇଟେଲ ବିଜେତା ହେଲା ଆର୍ଜେଣ୍ଟିନା । ଆର୍ଜେଣ୍ଟିନା ଫୁଟବଲ ସୁପରଷ୍ଟାର ମେସିଙ୍କ ଏହା ପ୍ରଥମ ବଡ ଅନ୍ତର୍ଜାତୀୟ ଟ୍ରଫି ।
ରିଓ ଦେ ଜାନିଏରୋର ସ୍ଥାନୀୟ ମାରାକାନା ଷ୍ଟାଡିୟମରେ ଆର୍ଜେଣ୍ଟିନା ପାଇଁ ବିଜୟ ଗୋଲ କରିଥିଲେ ଆଞ୍ଜେଲ ଦି ମାରିଆ । 33 ବର୍ଷୀୟ ଭେଟେରାନ ଷ୍ଟ୍ରାଇକର ବ୍ରାଜିଲର ଦୁର୍ବଳ ଡିଫେଣ୍ଡିଂର ଫାଇଦା ଉଠାଇ ଗୋଲକିପରଙ୍କୁ ଚମକା ଦେବାସହ ଅବିଶ୍ବସନୀୟ ଗୋଲ୍ କରିଥିଲେ । ସଂପୂର୍ଣ୍ଣ ଟୁର୍ଣ୍ଣାମେଣ୍ଟରେ ବ୍ରାଜିଲ ପାଇଁ ଏହା ତୃତୀୟ ଗୋଲ ଥିଲା ଯାହାକୁ ଗ୍ରହଣ କରିବାକୁ ଟିମ ବାଧ୍ୟ ହେଇଥିଲା । 1-0ରେ ଆଗୁଆ ହେବାପରେ ଅଧିକ ରକ୍ଷଣାତ୍ମକ ଓ ଯତ୍ନର ସହ ଖେଳିଥିଲା ଆର୍ଜେଣ୍ଟିନା । ବ୍ରାଜିଲର ଫୁଟବଲ ଷ୍ଟାର ନେମାର ଗୋଲ୍ କରିବାକୁ ସମସ୍ତ ପ୍ରୟାସ କରିଥିଲେ ମଧ୍ୟ ବିଫଳ ହୋଇଥିଲେ । ଆର୍ଜେଣ୍ଟିନା ଗୋଲକିପର ଏମିଲିଆନୋ ମାର୍ଟିନେଜ ଜମଜାର ପ୍ରଦର୍ଶନ ସହ ବ୍ରାଜିଲକୁ ନିରାଶ କରିଥିଲେ ।