କ୍ବାଲା ଲାମପୁର: ଏସିଆନ ଫୁଟବଲ ମହାସଂଘ ସୋମବାର ବଡ ନିଷ୍ପତ୍ତି ନେଇଛି । କ୍ବାତାରରେ ହେବାକୁ ଥିବା FIFA ବିଶ୍ବକପ 2022 ପାଇଁ ଏସିଆନ ଯୋଗ୍ୟତା ପର୍ଯ୍ୟାୟ ଗ୍ରୁପ ଏ ମ୍ୟାଚ୍ ଓ ଚାଇନାରେ ଖେଳାଯିବାକୁ ଥିବା AFC ଏସିଆନ କପ ମ୍ୟାଚ ଚାଇନାରେ ଖେଳାଯିବନି । ଏହି ମ୍ୟାଚ ଗୁଡିକୁ ଏକ ନ୍ୟୁଟ୍ରାଲ ଭେନ୍ୟୁକୁ ସ୍ଥାନାନ୍ତର କରାଯାଇଥିବା ଘୋଷଣା କରିଛି AFC । ତେବେ ନ୍ୟୁଟ୍ରାଲ ଭେନ୍ୟୁର ନାମ ଘୋଷଣା କରାଯାଇନଥିଲେ ମଧ୍ୟ ଖୁବଶୀଘ୍ର ଏହା ସ୍ପଷ୍ଟ ହେବ ବୋଲି ଜଣାପଡିଛି ।
ଏକାଧିକ ଅଂଶଗ୍ରହଣକାରୀ ଟିମ ଚାଇନା ଗସ୍ତ କରିବାକୁ ଅମଙ୍ଗ ହେବାପରେ ଏହି ନିଷ୍ପତ୍ତି ନିଆଯାଇଛି । ଏନେଇ AFC ପକ୍ଷରୁ ଏକ ଘୋଷଣାନାମାରେ ସ୍ପଷ୍ଟ କରାଯାଇଛି ।
ଚାଇନିଜ ଫୁଟବଲ ଆସୋସିଏସନ ସହ ଆଲୋଚନା ଜାରି ରହିଛି । ଖେଳାଳିଙ୍କ ସୁରକ୍ଷାକୁ ପ୍ରାଥମିକତା ଦିଆଯାଉଛି । ସଫଳତାର ସହ ଏସିଆନ ଯୋଗ୍ୟତା ପର୍ଯ୍ୟାୟ ମ୍ୟାଚ ଗୁଡିକ ଆୟୋଜନ ପାଇଁ ସମସ୍ତ ବ୍ୟବସ୍ଥା ହେଉଥିବା ଫୁଟବଲର ସର୍ବୋଚ୍ଚ ପରିଚାଳନା ବୋର୍ଡ ଘୋଷଣା କରିଛି । ତେବେ ପୂର୍ବରୁ ଧାର୍ଯ୍ୟ ଜୁନ 15, 2021 ସୁଦ୍ଧା ସମସ୍ତ ମ୍ୟାଚ ଶେଷ କରିବାକୁ AFC ଲକ୍ଷ୍ୟ ରଖିଛି ।