ହାଇଦ୍ରାବାଦ:ଦୁର୍ଘଟଣାର ଶିକାର ହୋଇ ବର୍ତ୍ତମାନ ଚିକିତ୍ସାଧୀନ ଅବସ୍ଥାରେ ରହିଛନ୍ତି ଟିମ୍ ଇଣ୍ଡିଆର ଷ୍ଟାର୍ ବ୍ୟାଟର ଋଷଭ ପନ୍ତ । ଏହି କଠିନ ସମୟରେ ବିଭିନ୍ନ ବ୍ୟକ୍ତି ବିଶେଷ ପନ୍ତଙ୍କ ଆଶୁ ଆରୋଗ୍ୟ କାମନା କରିଛନ୍ତି । ଏହି କ୍ରମରେ ପୂର୍ବତନ କ୍ୟାପଟେନ୍ କପିଲ ଦେବ ମଧ୍ୟ ଋଷଭ ପନ୍ତଙ୍କ ଆଶୁ ଆରୋଗ୍ୟ କାମନା କରିବା ସହ କେତେକ ପରାମର୍ଶ ଦେଇଛନ୍ତି । ପନ୍ତ ନିଜେ କାର ଚଳାଇବା ବଦଳରେ ଡ୍ରାଇଭରକୁ ସାଥିରେ ନେଇ ଆସିବାର ଥିଲା ବୋଲି କହିଛନ୍ତି କପିଲ ଦେବ । ଡିସେମ୍ବର ୩୦ ତାରିଖରେ ଋଷଭ ପନ୍ତ ନିଜେ କାର ଚଳାଇ ଉତ୍ତରାଖଣ୍ଡରୁ ଦିଲ୍ଲୀ ଆସୁଥିଲେ । ଏହାକୁ ନେଇ କପିଲ ଦେବ କହିଛନ୍ତି, "ଏହି ବୟସରେ ଆପଣଙ୍କ ଡ୍ରାଇଭ୍ କରିବା ରୁଚି ରହିଥିଲେ ମଧ୍ୟ କିଛି ଦାୟିତ୍ବ ମଧ୍ୟ ରହିଛି ।" ପନ୍ତ ଏବେ ଡେରାଡୁନ ମ୍ୟାକ୍ସ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଡାକ୍ତରଙ୍କ ସୂଚନା ଅନୁଯାୟୀ ତାଙ୍କ ସ୍ବାସ୍ଥ୍ୟାବସ୍ଥାରେ ଧୀରେଧୀରେ ସୁଧାର ଆସୁଛି ।
ପନ୍ତଙ୍କ ଦୁର୍ଘଟଣା ଖବର ସମସ୍ତ କ୍ରିକେଟ ପ୍ରେମୀଙ୍କୁ ବ୍ୟଥିତ କରିଛି । ପ୍ରଶଂସକମାନେ ତାଙ୍କର ଆଶୁ ଆରୋଗ୍ୟ କାମନା କରିଛନ୍ତି । ୧୯୮୩ ମସିହା ବିଶ୍ବକପ ବିଜେତା ତଥା କିମ୍ବଦନ୍ତୀ କ୍ରିକେଟର କପିଲ ଦେବ ପନ୍ତଙ୍କ ଆଶୁ ଆରୋଗ୍ୟ କାମନା କରିଛନ୍ତି । କପିଲ ଦେବ କହିଛନ୍ତି "ଏହି ଦୁର୍ଘଟଣାରେ ଆମ ସମସ୍ତଙ୍କୁ କିଛି ଶିଖିବାର ଅଛି । ଯେବେ ମୁଁ ଯୁବ କ୍ରିକେଟର ରହିଥିଲି, ମୋର ଦୁଇ ଚକିଆ ଯାନରେ ଦୁର୍ଘଟଣା ଘଟିଥିଲା । ସେହିଦିନଠାରୁ ମୋ ଭାଇ ଗାଡି ଛୁଇଁବାକୁ ଦେଇନଥିଲେ । ଭଗବାନଙ୍କୁ ଧନ୍ୟବାଦ ଯେ ଏତେ ବଡ ଦୁର୍ଘଟଣା ହେବା ପରେ ପନ୍ତ ସୁରକ୍ଷିତ ଅଛନ୍ତି ।"