ହାଇଦ୍ରାବାଦ: ସମାଲୋଚନାକାରୀଙ୍କୁ କଡା ଭାଷାରେ ଜବାବ ଦେଲେ କପିଲ ଦେବ । କହିଲେ ଆପଣ ଟିମ୍ ଇଣ୍ଡିଆକୁ ଚୋକର୍ସ କହିପାରିବେ । ହେଲେ ସେମାନଙ୍କ ପ୍ରଦର୍ଶନ ଏତେ ମାତ୍ରାରେ ବି ଖରାପ ରହି ନଥିଲା । ଭାରତ ନକ୍ ଆଉଟ ଷ୍ଟେଜରୁ ବିଦା ହେବା ଏହା ଦୁର୍ଭାଗ୍ୟଜନକ କଥା ବୋଲି କହିଛନ୍ତି ଭାରତର ଏହି କିମ୍ବଦନ୍ତୀ କ୍ରିକେଟର ।
ଚୁରମାର ହୋଇଛି ଟିମ୍ ଇଣ୍ଡିଆର ବିଶ୍ବକପ ଜିତିବା ସ୍ବପ୍ନ । ଦୀର୍ଘ ୧୫ ବର୍ଷ ପରେ ଭାରତ ପୁଣି ଥରେ ଟି୨୦ ବିଶ୍ବକପ ଜିତିବା ଆଶା ଆଶାରେ ରହିଯାଇଛି । ସେମିଫାଇନାଲରେ ଇଂଲଣ୍ଡଠାରୁ ୧୦ ୱିକେଟରେ ଭାରତ ଶୋଚନୀୟ ଭାବରେ ପରାସ୍ତ ହେବା ପରେ ରୋହିତ୍ ଏଣ୍ଡ କୋ ବିଭିନ୍ନ ଟ୍ରୋଲରେ ଶିକାର ହୋଇଛନ୍ତି ।
ଫାଇନାଲରେ ପ୍ରବେଶ କରିବାରେ ଟିମ୍ ଇଣ୍ଡିଆ ବିଫଳ ରହିବା ପରେ ଦଳ ବିଭିନ୍ନ ମହଲରେ ଏବେ ସମାଲୋଚନାର ଶିକାର ହେଉଛି । ଏନେଇ ମୁହଁ ଖୋଲିଛନ୍ତି ୧୯୮୩ ମସିହା ବିଶ୍ବକପ ବିଜେତା କପିଲ ଦେବ୍ । ସେ କହିଛନ୍ତି, "ବିଶ୍ବକପରୁ ବିଦା ହେବା ପରେ ଆମେ ସେମାନଙ୍କୁ ଚୋକର୍ସ କହିପାରିବା । ସେମାନେ ବିଶ୍ବକପ ହାତେଇବା ପାଇଁ ନିକଟତର ହୋଇଥିବା ବେଳେ ଅଧା ରାସ୍ତାରେ ବିଫଳ ହୋଇଗଲେ । ହେଲେ ଆପଣମାନେ ସେମାନଙ୍କ ଉପରେ ଏତେ ମାତ୍ରାରେ କଠୋର ହୁଅନ୍ତୁ ନାହିଁ । ମୁଁ ସ୍ବୀକାର କରୁଛୁ କି ଭାରତର ପ୍ରଦର୍ଶନ ସେମିଫାଇନାଲରେ ଅତ୍ୟନ୍ତ ନୈରାଶ୍ୟଜନକ ଥିଲା । ହେଲେ ଆମେ ସେମାନଙ୍କୁ ଆବଶ୍ୟକତାଠାରୁ ଅଧିକ ଆଲୋଚନା କରିବା ଠିକ୍ ନୁହଁ ।"
ଏହା ସହିତ କପିଲ ଦେବ ଇଂଲଣ୍ଡର ପ୍ରଦର୍ଶନକୁ ଭୂୟସୀ ପ୍ରଶଂସା କରିଛନ୍ତି । ଅଧିନାୟକ ଜୋସ୍ ବଟଲର ଓ ଆଲେକ୍ସ ହେଲ୍ସଙ୍କ ଜବରଦସ୍ତ ପାର୍ଟନରସିପ ୧୬ ଓଭରରେ ଟାର୍ଗେଟ ହାସଲ କରିବା ଘଟଣା ସମସ୍ତଙ୍କୁ ନିହାତି ଭାବରେ ଚକିତ କରିବ ବୋଲି କହିଛନ୍ତି କପିଲ ଦେବ । ଭାରତ ପରାଜୟର କାରଣ ଦର୍ଶାଇ କପିଲ ଦେବ କହିଛନ୍ତି, "ଅଷ୍ଟ୍ରେଲିଆ ପିଚ୍କୁ ଇଂଲିସ୍ ଟିମ୍ ଗଭୀର ଭାବରେ ତର୍ଜମା କରିଥିଲେ । ସେହି ଅନୁସାରେ ସେମାନେ ରଣନୀତି ପ୍ରସ୍ତୁତ କରି ମଇଦାନକୁ ଓହ୍ଲାଇଥିଲେ । ଆମେ ଟିମ୍ ଇଣ୍ଡିଆ କ୍ରିକେଟରଙ୍କ ଉପରେ ଏତେ ମାତ୍ରାରେ କଠୋର ହେବା ଉଚିତ୍ ନୁହଁ । ସେମାନେ ସେମିଫାଇନାଲରେ ପ୍ରବେଶ କରି ଦେଶର ଗୌରବ ବଢାଇଛନ୍ତି । ୧୬୮-୧୭୦ ବିପକ୍ଷ ଦଳକୁ ଟାର୍ଗେଟ ଦେବାକୁ ଉଚିତ୍ ସ୍କୋର ଅଟେ । ହେଲେ ଯଦି ଆପଣ ପିଚ୍କୁ ଦେଖି ଠିକ୍ ଭାବରେ ବୋଲିଂ ପ୍ରଦର୍ଶନ ନ କରିବେ ତାହେଲେ ପରିଣାମ ଏମିତି ରହିବ । ଏହା ଇଂଲଣ୍ଡ ପାଇଁ ସହଜ ବିଜୟ ରହିଥିଲା । ଆପଣ ଦେଖନ୍ତୁ ସେମାନେ କିଭଳି ଭାବରେ ସର୍ଟ ବୋଲିଂ କରିଥିଲେ ।"
