ଲଣ୍ଡନ: ରାତି ପାହିଲେ ଆରମ୍ଭ ହେବ ମହାମୁକାବିଲା । ବିଶ୍ବ ଟେଷ୍ଟ ଚମ୍ପିଆନ୍ସିପ୍ ଟ୍ରଫି ହାତେଇବା ପାଇଁ ଇଂଲଣ୍ଡର 'ଦ ଓଭାଲ'ରେ ଅଷ୍ଟ୍ରେଲିଆକୁ ଭେଟିବ ଟିମ୍ ଇଣ୍ଡିଆ । ଭାରତୀୟ ସମୟ ଅନୁସାରେ ଏହି ହାଇପ୍ରୋଫାଇଲ ଫାଇନାଲ ମ୍ୟାଚ୍ ଆସନ୍ତାକାଲି ଅପରାହ୍ନ ୩ଟାରୁ ଆରମ୍ଭ ହେବ । ତେବେ ଏହି ବଡ଼ ମୁକାବିଲା ପୂର୍ବରୁ ପିଚ୍ର କିଛି ଚିତ୍ର ସାମ୍ନାକୁ ଆସିଛି । ଏଥିରୁ ପିଚ୍ର ସ୍ଥିତି କିପରି ରହିବ, ତାହା ସହଜରେ ଅନୁମାନ କରିହେବ । ତେବେ ଜାଣନ୍ତୁ WTC ଫାଇନାଲ ପାଇଁ କିପରି ରହିବ ଦ ଓଭାଲ ପିଚ୍, ଏବଂ ଟସ ଜିତି ପ୍ରଥମେ ବ୍ୟାଟିଂ ନା ବୋଲିଂ କରିବା ହେବ ଫାଇଦା ।
ସବୁଜ ପିଚ୍ରେ ହେବ ମୁକାବିଲା: ଭାରତ ଓ ଅଷ୍ଟ୍ରେଲିଆ ମଧ୍ୟରେ ଆରମ୍ଭ ହେବାକୁ ଯାଉଥିବା WTC ଫାଇନାଲ ମୁକାବିଲା ସମ୍ପୂର୍ଣ୍ଣ ସବୁଜ ପିଚ୍ରେ ହେବ । ଏବେ ଏବେ ପିଚ୍ର ଯେଉଁ ଚିତ୍ର ସାମ୍ନାକୁ ଆସିଛି, ସେଥିରେ ସମ୍ପୂର୍ଣ୍ଣ ପିଚ୍ରେ ସବୁଜ ଘାସ ସ୍ପଷ୍ଟ ଦେଖିବାକୁ ମିଳିଛି । ଏହି ମହାମୁକାବିଲାରେ ଇଂରାଜୀ କମେଣ୍ଟେଟର୍ ଭୂମିକାରେ ଆସୁଥିବା ଦିନେଶ କାର୍ତ୍ତିକ ନିଜ ଟ୍ବିଟର ହ୍ୟାଣ୍ଡେଲରେ ପିଚ୍ର କିଛି ଫଟୋ ସେୟାର କରିଛନ୍ତି । ଯେଉଁଥିରେ ପିଚ୍ ସମ୍ପୂର୍ଣ୍ଣ ଭାବରେ ସବୁଜ ଘାସରେ ପରିପୂର୍ଣ୍ଣ ରହିଥିବା ଦେଖିବାକୁ ମିଳିଛି ।