ହାଇଦ୍ରାବାଦ:140 କୋଟି ଭାରତୀୟ ନିରାଶ । ତୃତୀୟ ଥର ଭାରତର ବିଶ୍ବକପ ହାତେଇବା ସ୍ବପ୍ନ ଧୂଳିସାତ ହୋଇଛି । ହାତ ପାହାନ୍ତାରୁ ଟ୍ରଫି ଦୂରେଇ ଗଲା । ଦେଶବାସୀଙ୍କ ଅଘୋଶିତ ଶୋକ ପାଳନ ଭିତରେ ଭାରତୀୟ ଖେଳାଳିଙ୍କର କିଛି ରେକର୍ଡ ଫ୍ୟାନ୍ସଙ୍କୁ ସାମାନ୍ୟ ଖୁସି ଦେଇଛି । ଚଳିତ ବିଶ୍ବକପ ସଂସ୍କରଣରେ ରନ ମେସିନ ବିରାଟ କୋହଲି ଏକାଧିକ ରେକର୍ଡର ଅଧିକାରୀ ହୋଇଛନ୍ତି । ବିଶ୍ବକପ 2023ରେ ସର୍ବଶ୍ରେଷ୍ଠ ବ୍ୟାଟର ବିବେଚିତ ହୋଇ ପ୍ଲେୟାର ଅଫ ଦି ଟୁର୍ଣ୍ଣାମେଣ୍ଟ ହାତେଇଛନ୍ତି ବିରାଟ କୋହଲି । ଚଳିତ ବିଶ୍ବକପରେ ସର୍ବାଧିକ 765 ରନ ତାଙ୍କ ଖାତାରେ ରହିଛି । ଏହା ସହିତ ଗୋଟିଏ ୱିକେଟ ମଧ୍ୟ ହାସଲ କରିଛନ୍ତି କୋହଲି ।
ଭାରତ ବିଶ୍ବକପ ଫାଇନାଲରେ ଅଷ୍ଟ୍ରେଲିଆଠୁ ପରାସ୍ତ ହୋଇଛି । ମୁକୁଟ ଜିତିପାରି ନଥିଲେ ବି ରନ୍ ମେସିନ କିଙ୍ଗ୍ କୋହଲି ସବୁଠାରୁ ସଫଳ ବ୍ୟାଟର ସାବ୍ୟସ୍ତ ହୋଇଛନ୍ତି । ବିରାଟ କୋହଲି 11 ମ୍ୟାଚରୁ 3 ଶତକ ସହ ମୋଟ 765 ରନ କରିଛନ୍ତି । ଏହା ସହିତ ଗୋଟିଏ ୱିକେଟ୍ ମଧ୍ୟ ହାସଲ କରିଛନ୍ତି । ବିଶ୍ବକପ ତ୍ରୟୋଦଶ ସଂସ୍କରଣର ପ୍ଲେୟାର ଅଫ ଦି ଟୁର୍ଣ୍ଣାମେଣ୍ଟ ବିବେଚିତ ହୋଇଛନ୍ତି । ବିଶ୍ବକପ 2023ରେ ସର୍ବାଧିକ ରନ ସଂଗ୍ରହକାରୀ ବ୍ୟାଟର ହେବାର ସୌଭାଗ୍ୟ ଲାଭ କରିଛନ୍ତି । ପାକିସ୍ତାନ (16ରନ) ଓ ଇଂଲଣ୍ଡ (0) ବିପକ୍ଷ ମ୍ୟାଚ ଛାଡିଦେଲେ ଅନ୍ୟ 9ଟି ମ୍ୟାଚରେ 50ରୁ ଅଧିକ ସ୍କୋର କରିଛନ୍ତି । ତାଙ୍କ ନାମରେ 6ଟି ଅର୍ଦ୍ଧଶତକ ଓ 3ଟି ଶତକ ରହିଛି ।
ଚଳିତ ବିଶ୍ବକପରେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ରେକର୍ଡ ଭାଙ୍ଗିଥିଲେ । 49 ଦିନିକିଆ ଶତକ ରେକର୍ଡ ଭାଙ୍ଗି 50ତମ ଶତକ ହାସଲ କରିଥିବା ବିରାଟ କୋହଲି ବିଶ୍ବକପ ଫାଇନାଲରେ ଅଷ୍ଟ୍ରେଲିଆର ପୂର୍ବତନ ଅଧିନାୟକ ରିଙ୍କିଂ ପଣ୍ଟିଂଙ୍କୁ ଟପିଛନ୍ତି । ବିଶ୍ବକପ ଫାଇନାଲରେ ସେ 54ରନ୍ର ପାଳି ଖେଳିଥିଲେ । ବିଶ୍ବକପରେ ଏକ ସିଙ୍ଗଲ ସଂସ୍କରଣରେ ସର୍ବାଧିକ ରନ ସ୍କୋରର ବିବେଚିତ ହୋଇଛନ୍ତି । ବିଶ୍ବକପରେ ପଣ୍ଟିଂ 1,743 ରନ କରିଥିବା ବେଳେ କୋହଲି 37ଟି ମ୍ୟାଚ ଖେଳି 1795 ରନ କରିଛନ୍ତି । ବିଶ୍ବକପରେ ଦ୍ବିତୀୟ ସର୍ବାଧିକ ରନ୍ ସ୍କୋରର ହୋଇଛନ୍ତି ରନ୍ ମେସିନ ବିରାଟ କୋହଲି ।