ଚେନ୍ନାଇ: ଚେନ୍ନାଇର ଏମ୍ଏ ଚିଦାମ୍ବରମ୍ ଷ୍ଟାଡିୟମରେ ଭାରତ ଓ ଅଷ୍ଟ୍ରେଲିଆ ମ୍ୟାଚ ଚାଲିଥିବା ସମୟରେ ପଡିଆକୁ ପ୍ରବେଶ କରିବା ଇଂଲଣ୍ଡର ପ୍ରାଙ୍କଷ୍ଟାର ତଥା ୟୁଟ୍ୟୁବର ଜାର୍ଭୋଙ୍କୁ ମହଙ୍ଗା ପଡିଛି। ଜାର୍ଭୋଙ୍କୁ ପୁରା ବିଶ୍ବକପ ମ୍ୟାଚ ଦେଖିବାକୁ ବାରଣ କରିଛି ICC । ଆଗକୁ ହେବାକୁଥିବା ବିଶ୍ବକପ ମ୍ୟାଚରେ ଜାର୍ଭୋଙ୍କୁ ଷ୍ଟାଡିୟମ ଭିତରକୁ ପ୍ରବେଶକୁ ICC ବ୍ୟାନ କରିଛି । ତେବେ ପ୍ରଶ୍ନ ଉଠୁଛି ଏତେ କଡ଼ା ସୁରକ୍ଷା ପରେ ବି କିପରି ରିଜର୍ଭ ସିଟ୍ ପାଖରେ ପହଞ୍ଚିବା ପରେ ପଡ଼ିଆ ମଧ୍ୟକୁ କିପରି ପ୍ରବେଶ କଲେ ଜାର୍ଭୋ ।
ଆଇସିସି ମୁଖପାତ୍ର ଏନେଇ ଗଣମାଧ୍ୟମକୁ କହିଛନ୍ତି ଯେ, ଖେଳ ଚାଲିଥିବା ସମୟରେ ଜାର୍ଭୋ ପଡ଼ିଆ ମଧ୍ୟକୁ ହଠାତ ପ୍ରବେଶ କରିଥିଲେ । ଏହାପରେ ତାଙ୍କୁ ବିଶ୍ବକପର ବଳକା ମ୍ୟାଚ ଦେଖିବା ଉପରେ ପ୍ରତିବନ୍ଧକ ଲଗାଯାଇଛି । ଏହି ମାମଲା ବର୍ତ୍ତମାନ ଭାରତୀୟ କର୍ତ୍ତୃପକ୍ଷଙ୍କ ହାତରେ । ୟୁଟ୍ୟୁବର ଜାର୍ଭୋ ପ୍ରଥମ ଥର ନୁହଁ ବରଂ ଚତୁର୍ଥ ଥର ପାଇଁ ଅନ୍ତର୍ଜାତୀୟ କ୍ରିକେଟ ମ୍ୟାଚ୍ ବେଳେ ଫିଲ୍ଡ ମଧ୍ୟକୁ ପ୍ରବେଶ କରି ବ୍ୟାଘାତ ସୃଷ୍ଟି କରିଛନ୍ତି । ଏହାପୂର୍ବରୁ ଭାରତ ଓ ଇଂଲଣ୍ଡ ମଧ୍ୟରେ ଚାଲିଥିବା ଦିନିକିଆ ଓ ଟେଷ୍ଟ ମ୍ୟାଚ୍ ସମୟରେ ବି ପଡ଼ିଆରେ ଅନୁପ୍ରବେଶ କରିଥିଲେ ଜାର୍ଭୋ । ରବିବାର ପୁଣି ଥରେ ସେ ଖେଳ ଚାଲିଥିବା ସମୟରେ ପଡ଼ିଆକୁ ପ୍ରବେଶ କରିବାରୁ ଘଟଣା ପରେ ଆଇସିସି ଏବଂ ବିସିସିଆଇକୁ ଲଜ୍ଜିତ ହେବାକୁ ପଡ଼ିଥିଲା । ବିନା କୌଣସି ବାଧାବିଘ୍ନରେ ଭାରତୀୟ ଦଳର ଜର୍ସି ପିନ୍ଧି ପଡ଼ିଆକୁ ପ୍ରବେଶ କରିଥିଲେ ଜାର୍ଭୋ । ଏହାପରେ ଭାରତୀୟ ଦଳର ଷ୍ଟାର କ୍ରିକେଟର ବିରାଟ କୋହଲିଙ୍କ ନିକଟତର ହେବାକୁ ଚେଷ୍ଟା କରିଥିଲେ ।