ଦୁବାଇ: ପ୍ରକାଶ ପାଇଛି ICC ମହିଳା ODI ମାନ୍ୟତା । ସଦ୍ୟ ପ୍ରକାଶିତ ମାନ୍ୟତାରେ ଭାରତୀୟ କ୍ୟାପଟେନ ମିତାଲି ରାଜ ଷଷ୍ଠ ସ୍ଥାନରେ ପହଞ୍ଚିଛନ୍ତି । ଦକ୍ଷିଣ ଆଫ୍ରିକୀୟ ଓପନର ଲାଉରା ୱଲଭାରଡଟ ବିଶ୍ବକପ ଟୁର୍ଣ୍ଣାମେଣ୍ଟରେ ଜବରଦସ୍ତ ପ୍ରଦର୍ଶନ ସହ ବ୍ୟାଟିଂ ମାନ୍ୟତାର ଶୀର୍ଷ ସ୍ଥାନ ଅକ୍ତିଆର କରିଛନ୍ତି ।
ୱଲଭାରଡଟ ଏଯାବତ ଚଳିତ ବିଶ୍ବକପ ଟୁର୍ଣ୍ଣାମେଣ୍ଟରେ ୪୩୩ ରନ୍ ସଂଗ୍ରହ କରି ସର୍ବାଧିକ ରନ ସଂଗ୍ରହକାରୀ ଖେଳାଳି ରହିଛନ୍ତି । ୭ଟି ଇଂନିସରୁ ସେ ୫ଟି ଅର୍ଦ୍ଧଶତକୀୟ ଇଂନିସ ଖେଳିସାରିଛନ୍ତି । ଏପରିକି ବିଶ୍ବକପ ଟୁର୍ଣ୍ଣାମେଣ୍ଟର ବିଜେତା ଦାବିଦାର ଅଷ୍ଟ୍ରେଲିଆ ବିପକ୍ଷରେ ୯୦ ରନ୍ର ଇଂନିସ ତାଙ୍କର ଚଳିତ ବିଶ୍ବକପ ଟୁର୍ଣ୍ଣାମେଣ୍ଟରେ ସର୍ବାଧିକ ସ୍କୋର । ନ୍ୟୁଜିଲାଣ୍ଡରେ ଖେଳାଯାଉଥିବା ବିଶ୍ବକପ ଟୁର୍ଣ୍ଣାମେଣ୍ଟରେ ଦମଦାର ଫର୍ମରେ ଥିବା ୱଲଭାରଡଟ ଦୁଇ ଜଣ ଅଷ୍ଟ୍ରେଲୀୟ ଖେଳାଳିଙ୍କୁ ପଛରେ ପକାଇ ସଦ୍ୟତମ ODI ମାନ୍ୟତାର ଶୀର୍ଷରେ ପହଞ୍ଚିଛନ୍ତି ।