ହାଇଦ୍ରାବାଦ: ଦୁଲୀପ ଟ୍ରଫି ଚମ୍ପିଆନ ହୋଇଛି ପଶ୍ଚିମାଞ୍ଚଳ ଟିମ୍ । ଅଜିଙ୍କ୍ୟ ରାହାଣେଙ୍କ ନେତୃତ୍ବାଧୀନ ପଶ୍ଚିମାଞ୍ଚଳ ଟିମ୍ 2022-23 ସିଜନରେ ଦୁଲୀପ ଟ୍ରଫି ବିଜୟୀ ହେବାର ଗୌରବ ଅର୍ଜନ କରିଛି । ଫାଇନାଲ ମୁକାବିଲାରେ ଦକ୍ଷିଣାଞ୍ଚଳକୁ 294 ରନରେ ପରାସ୍ତ କରି ବାଜି ମାରିଛି ପଶ୍ଚିମାଞ୍ଚଳ । ମ୍ୟାଚର ପଞ୍ଚମ ଦିନରେ ଦକ୍ଷିଣାଞ୍ଚଳ ଦ୍ବିତୀୟ ଇନିଂସରେ 234 ରନରେ ଅଟକି ଯାଇଥିଲା । ଦ୍ବିଶତକୀୟ ଇନିଂସ ଖେଳି ଦଳ ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିବା ଯୁବ ଓପନର ଯଶସ୍ବୀ ଜୈସ୍ବାଲ ପ୍ଲେୟାର ଅଫ୍ ଦ ମ୍ୟାଚ ଏବଂ ପେସ ବୋଲର ଜୟଦେବ ଉନାକାତ ପ୍ଲେୟାର ଅଫ୍ ଦ ସିରିଜ ବିବେଚିତ ହୋଇଥିଲେ । ଚତୁର୍ଥ ଦିନ ସୁଦ୍ଧା ପଶ୍ଚିମାଞ୍ଚଳ ବିଜୟ ନିଶ୍ଚିନ୍ତ ଥିଲା ।
ପଞ୍ଚମ ଦିନ ତଥା ଅନ୍ତିମ ଦିନରେ ପଞ୍ଚିମାଞ୍ଚଳକୁ ବିଜୟ ପାଇଁ 4 ୱିକେଟ ଆବଶ୍ୟକ ଥିଲା । 529 ରନ ବିଜୟ ଲକ୍ଷ୍ୟର ପିଛା କରୁଥିବା ଦକ୍ଷିଣାଞ୍ଚଳ ଷ୍ଟମ୍ପ ଅପସାରଣ ସୁଦ୍ଧା 6 ୱିକେଟ ହରାଇ 154 ରନ କରିଥିଲା । ଦକ୍ଷିଣାଞ୍ଚଳ 234 ରନରେ ଅଟକି ଯାଇଥିଲା । ଦଳ ପକ୍ଷରୁ ରବି ତେଜା 53 ରନ ଓ କ୍ରିଷ୍ଣାପ୍ପା ଗୋଥମ 17 ରନ କରିଥିଲେ । ପଞ୍ଚିମାଞ୍ଚଳ ପକ୍ଷରୁ ସାମ୍ସ ମୁଲାନି 4ଟି ୱିକେଟ ଅକ୍ତିଆର କରିଥିଲେ।