ହାଇଦ୍ରାବଦ: ଦୀର୍ଘଦିନର ନୀରବତା ପରେ ପୁଣ ଥରେ ପୁରୁଣା ଲୟକୁ ଫେରିଛନ୍ତି କ୍ରିକେଟ୍ର କିଙ୍ଗ୍ ବିରାଟ କୋହଲି । ଚଳିତ ବିଶ୍ବକପରେ ଦମଦାର ପ୍ରଦର୍ଶନ ପରେ ଅକ୍ଟୋବର ମାସର ଶ୍ରେଷ୍ଠ କ୍ରିକେଟର୍ ଭାବେ ବିରାଟ କୋହଲିଙ୍କୁ ଚୟନ କରିଛି ଆଇସିସି । ତେବେ ଏହାକୁ ମିଶାଇ କ୍ରିକେଟ୍ ଇତିହାସରେ ପ୍ରଥମ ଖେଳାଳି ଭାବେ ଦଶମ ଆଇସିସି ଆୱାର୍ଡ୍ ହାସଲ କରିଛନ୍ତି କୋହଲି ।
୩ ବର୍ଷର ଶ୍ରେଷ୍ଠ ଦିନିକିଆ ଖେଳାଳି
ଦିନିକିଆ କ୍ରିକେଟ୍ରେ ବର୍ତ୍ତମାନ ୧୨ ହଜାରରୁ ଊର୍ଦ୍ଧ୍ବ ରନ ସଂଗ୍ରହ କରିଛନ୍ତି ବିରାଟ କୋହଲି । ୨୦୧୨ ମସିହାରେ ୧୭ ପାଳିରୁ ୫ ଶତକ ଓ ୩ ଅର୍ଦ୍ଧ ଶତକ ସହିତ ମୋଟ ୧୦୨୬ ରନ ସଂଗ୍ରହ କରି ସେ ପ୍ରଥମ ଥର ପାଇଁ ସେହି ବର୍ଷର ଶ୍ରେଷ୍ଠ ଦିନିକିଆ କ୍ରିକେଟର୍ ଭାବେ ଚୟନ ହୋଇଥଲେ । ଏହା ପରେ ୨୦୧୭ରେ ୨୬ ପାଳିରୁ ୬ ଶତକ ଓ ୭ ଅର୍ଦ୍ଧ ଶତକ ସହିତ ସେ ମୋଟ ୧୪୬୦ ରନ ସଂଗର୍ହ କରି ଦ୍ବିତୀୟ ଥର ପାଇଁ ଦିନିକିଆ କ୍ରିକେଟ୍ରେ ଶ୍ରେଷ୍ଠ ଖେଳାଳି ଆୱାର୍ଡ୍ ପାଇଥିଲେ । ଲଗାତାର ଭାବେ ୨୦୧୮ରେ ମଧ୍ୟ ମାତ୍ର ୧୪ ପାଳିରୁ ୬ ଶତକ ଓ ୩ ଅର୍ଦ୍ଧ ଶତକ ସହ ମୋଟ ୧୨୦୨ ରନ ସଂଗ୍ରହ କରି ତୃତୀୟ ଥରପାଇଁ ଶ୍ରେଷ୍ଠ ଦିନିକିଆ କ୍ରିକେଟର୍ ଚୟନ ହୋଇଥିଲେ ।
୨୦୧୮ ବର୍ଷର ଶ୍ରେଷ୍ଠ ଟେଷ୍ଟ କ୍ରିକେଟର୍
ବିରାଟ କୋହଲିଙ୍କ ଅଧିନାୟକତ୍ବରେ ଭାରତ ଟେଷ୍ଟ କ୍ରିକେଟ୍ର ଶୀର୍ଷତମ ସ୍ଥାନରେ ପହଞ୍ଚି ପାରିଥିଲା । ଟେଷ୍ଟରେ ଏପର୍ଯ୍ୟନ୍ତ ସମୁଦାୟ ୧୦୨ ମ୍ୟାଚରେ ୧୭୩ ପାଳି ଖେଳିଥିବା କୋହଲି ୨୭ ଶତକ ଓ ୨୮ ଅର୍ଦ୍ଧ ଶତକ ସହ ୮ ହଜାରରୁ ଊର୍ଦ୍ଧ୍ବ ରନ ସଂଗ୍ରହ କରିଛନ୍ତି । ତେବେ ୨୦୧୮ ମସିହାରେ ୧୩ ମ୍ୟାଚରେ ୨୪ ପାଳି ଖେଳି ୫ଟି ଲେଖାଏଁ ଶତକ ଓ ଅର୍ଦ୍ଧ ଶତକ ସହିତ ୧୩୨୨ ରନ ସଂଗ୍ରହ କରିଥିଲେ । ଏଭଳି ରେକର୍ଡ ପାଇଁ ସେହି ବର୍ଷ ଆଇସିସି ଶ୍ରେଷ୍ଠ ଟେଷ୍ଟ କ୍ରିକେଟର୍ ଭାବେ ପୁରସ୍କୃତ କରିଥିଲା ।
୨୦୧୭ ଓ ୧୮ ବର୍ଷର ଶ୍ରେଷ୍ଠ କ୍ରିକେଟର୍
କ୍ରିକେଟ୍ର ସବୁ ଫର୍ମାଟ୍ରେ ନିଜର ଦବଦବା ଦେଖାଇ ନିଜ ଦଳ ପାଇଁ ରନ ସଂଗ୍ରହ କରିଚାଲିଥାନ୍ତି ବିରାଟ । ସେଥିପାଇଁ ତାଙ୍କୁ କ୍ରିକେଟ୍ର ରନ୍ ମେସିନ୍ ବୋଲି କୁହାଯାଏ । ତେବେ ଟେଷ୍ଟ, ଦିନିକିଆ ଓ T20 ଫର୍ମାଟରେ ଶ୍ରେଷ୍ଠ ପ୍ରଦର୍ଶନ ପାଇଁ ୨୦୧୭ ଓ ୨୦୧୮ ମସିହାରେ ଲଗାତାର ଦୁଇଥର ବର୍ଷର ଶ୍ରେଷ୍ଠ କ୍ରିକେଟର୍ ଆୱାର୍ଡ ହାତେଇଥିଲେ କୋହଲି ।