ନୂଆଦିଲ୍ଲୀ: ଭାରତର ପ୍ରଥମ CDS (Chief Of Defence staff) ଜେନେରାଲ ବିପିନ ରାୱତ, ତାଙ୍କ ପତ୍ନୀ ମଧୁଲିକା ରାୱତ ଓ ଅନ୍ୟ ୧୧ ଜଣଙ୍କର ତାମିଲନାଡୁରେ ଦୁଃଖଦ ଚପର ଦୁର୍ଘଟଣାରେ ମୃତ୍ୟୁ ହୋଇଛି । ଏହି ଘଟଣାରେ ସାରା ଦେଶ ସ୍ତବ୍ଧ ହୋଇଯାଇଛି । ବିପିନ ରାୱତଙ୍କ ରୂପରେ ଦେଶ ଜଣେ ସଚ୍ଚା ଦେଶ ଭକ୍ତ, ଦକ୍ଷ ସେନାନାୟକ ଓ ସେନାର ସବୋର୍ଚ୍ଚ ମୁଖ୍ୟଙ୍କୁ ହରାଇଛି ।
ଫଳରେ ସାଧାରଣ ନାଗରିକଙ୍କ ଠାରୁ ନେଇ ପ୍ରଧାନମନ୍ତ୍ରୀ, ରାଷ୍ଟ୍ରପତିଙ୍କ ପର୍ଯ୍ୟନ୍ତ ସମସ୍ତେ ଦୁଃଖ ପ୍ରକାଶ କରିବା ସହ ବୀର ସୈନିକଙ୍କ ଅମର ଆତ୍ମାର ସଦଗତି କାମନା କରିଛନ୍ତି । ଏହିକ୍ରମରେ ଭାରତୀୟ ଟେଷ୍ଟ କ୍ୟାପଟେନ ବିରାଟ କୋହଲିଙ୍କ ସମେତ ପୂର୍ବତନ ଓ ବର୍ତ୍ତମାନର କ୍ରିକେଟର ଶୋକବ୍ୟକ୍ତ କରିଛନ୍ତି ।
ବିରାଟ କୋହଲି ଟ୍ବିଟ୍ରେ ଲେଖିଛନ୍ତି, "ଦୁଃଖଦ ହେଲିକପ୍ଟର ଦୁର୍ଘଟଣାରେ CDS ବିପିନ ରାୱତ (Gen Bipin Rawat) ଓ ଅନ୍ୟ ଅଧିକାରୀଙ୍କ ଆକସ୍ମିତ ମୃତ୍ୟୁରେ ଅତ୍ୟନ୍ତ ଦୁଃଖିତ । ଶୋକସନ୍ତପ୍ତ ବନ୍ଧୁ ଓ ପରିବାର ବର୍ଗ ପ୍ରତି ଗଭୀର ସମବେଦନା ।"
ହେଲିକପ୍ଟର ଦୁର୍ଘଟଣାରେ ଭାରତୀୟ ବାୟୁ ସେନା (Indian Air Force) ବୁଧବାର ସନ୍ଧ୍ୟାରେ ଜେନେରାଲ ରାୱତ, ତାଙ୍କର ପତ୍ନୀଙ୍କ ସମେତ ୧୩ଜଣ ବ୍ୟକ୍ତିଙ୍କ ମୃତ୍ୟୁ ନେଇ ସ୍ପଷ୍ଟ କରିଥିଲା ।