ଥାନେ(ମୁମ୍ବାଇ): ଚଳିତ ବିଜୟ ହଜାରେ ଟ୍ରଫି (Vijay Hazare Trophy) ରେ ଟିମ ଓଡିଶାର ଦମଦାର ପ୍ରଦର୍ଶନ । ଆନ୍ଧ୍ର, ଗୁଜୁରାଟ ପରେ ଶନିବାର ବିଦର୍ଭକୁ ହରାଇ ଟୁର୍ନାମେଣ୍ଟରେ ଏଯାବତ ଅପରାଜେୟ ରହିଛି ଓଡିଶା । ଶୁଭ୍ରାଂଶୁ ସେନାପତିଙ୍କ ନେତୃତ୍ବରେ ଟିମ୍ର ବିଜୟ ଧାରା ଜାରି ରହିଛି । ଉଭୟ ବ୍ୟାଟିଂ, ବୋଲିଂ ଓ ଫିଲ୍ଡିଂ ସମସ୍ତ ବିଭାଗରେ ପ୍ରଭାବୀ ପ୍ରଦର୍ଶନ କରିଛି । ଫଳରେ ଏଲିଟ ଗ୍ରୁପ ଏ'ରେ ଥିବା ଟିମ ଓଡିଶା ୩ଟି ମ୍ୟାଚ୍ରୁ ୧୨ ପଏଣ୍ଟ ସହ ଗ୍ରୁପର ଶୀର୍ଷରେ ରହିଛି ।
ଶନିବାର ଥାନେର ଦାଦୋଜୀ କୋନ୍ଦେବ ଷ୍ଟାଡିୟମରେ ବିଦର୍ଭକୁ ୬ ୱିକେଟରେ ହରାଇଛି ଓଡିଶା । ଏହି ମ୍ୟାଚ୍ରେ ଓଡିଶା ବୋଲରଙ୍କ ଘାତକ ପ୍ରଦର୍ଶନ ଦେଖିବାକୁ ମିଳିଥିଲା । ଅଭିଶେକ ରାଉତ ବିଦର୍ଭ ବ୍ୟାଟିଂକ୍ରମକୁ ଧ୍ବସ୍ତ କରିବା ସହ ସର୍ବାଧିକ ୫ଟି ୱିକେଟ ହାତେଇଥିଲେ ।