ହାଇଦ୍ରାବାଦ: କ୍ରିକେଟ ଜଗତରୁ ଆସିଛି ଆଉ ଏକ ସ୍ତବ୍ଦ କରିଦେବା ଭଳି ଖବର । ଭାରତୀୟ ମହିଳା କ୍ରିକେଟ ଟିମର ଷ୍ଟାର ଖେଳାଳି ବେଦା କ୍ରୀଷ୍ଣାମୂର୍ତ୍ତୀଙ୍କ ପରିବାର ଉପରେ ଯେମିତି କୋରୋନା ଅଧିକ ନିଷ୍ଠୁର ହୋଇଯାଇଛି । ମା'ଙ୍କୁ ହରାଇବାର ମାତ୍ର ଦୁଇ ସପ୍ତାହ ମଧ୍ୟରେ ବେଦାଙ୍କ ଭଉଣୀଙ୍କୁ ଛଡାଇନେଇଛି ମହାମାରୀ କୋରୋନା । ଏହି ଖବର ବେଦାଙ୍କ ପୂର୍ବତନ କୋଚ୍ ଇରଫାନ ସଇତ ଇନଷ୍ଟାଗ୍ରାମ ଜରିଆରେ ଜଣାଇଛନ୍ତି ।
ବେଦାଙ୍କ ଭଉଣୀ ବତସଲା ଶିବକୁମାର ଗତ ମାସରୁ କୋରୋନାରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ । ଶେଷରେ ଜୀବନ ଯୁଦ୍ଧରେ ସେ ହାରିଯାଇଥିବା ଜଣାପଡିଛି ।
ପୂର୍ବରୁ ବେଦା ମା'ଙ୍କ ମୃତ୍ୟୁ ନେଇ ଟ୍ବିଟ କରିଥିଲେ ଓ ଲେଖିଥିଲେ, " ମା' ଙ୍କ ଦେହାନ୍ତ ଖବରରେ ଆପଣଙ୍କ ଅଗଣିତ ସମବେଦନାପୂର୍ଣ୍ଣ ବାର୍ତ୍ତା ପାଇଛି । ତାଙ୍କ ବିନା ମୋ ପରିବାର ବିଷୟରେ କଳ୍ପନା କରିବା କଷ୍ଟକର । ବର୍ତ୍ତମାନ ଆମେ ଭଉଣୀ ପାଇଁ ପ୍ରାର୍ଥନା କରୁଛୁ ।" ଏଥିସହ ତାଙ୍କର କୋଭିଡ-19 ରିପୋର୍ଟ ନେଗେଟିଭ ଥିବା ମଧ୍ୟ ସ୍ପଷ୍ଟ କରିଥିଲେ ।