କେପଟାଉନ: ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ଖେଳାଯାଉଥିବା ଟେଷ୍ଟ ସିରିଜର ତୃତୀୟ ମ୍ୟାଚ୍ କେପଟାଉନରେ ଜାନୁଆରୀ ୧୧ରୁ ଆରମ୍ଭ ହେବ । ଏଥିପାଇଁ ଶନିବାର ଭାରତୀୟ ଟିମ କେପଟାଉନରେ ପହଞ୍ଚିଛି । ଏକ ଚାଟାର୍ଡ ବିମାନ ଯୋଗେ ଜୋହାନ୍ସବର୍ଗରୁ ଟିମ କେପଟାଉନ ପହଞ୍ଚିଛି । COVID-19 କଟକଣାକୁ ଉଭୟ ଟିମ ପାଳନ କରିଛନ୍ତି ।
ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(BCCI) ପକ୍ଷରୁ ଏକ ଭିଡିଓ ସେୟାର କରାଯାଇଛି ଯେଉଁଥିରେ, ଭାରତୀୟ ଖେଳାଳିଙ୍କୁ ଟିମ ହୋଟେଲରେ ଭବ୍ୟ ସ୍ବାଗତ କରାଯାଉଛି । କେପଟାଉନର ନ୍ୟୁଲାଣ୍ଡ୍ସରେ ଅଭ୍ୟାସ ଆରମ୍ଭ କରିବା ପୂର୍ବରୁ ଭାରତୀୟ ଟିମ ବାୟୋବବଲରେ ସମୟ ଅତିବାହିତ କରିବ । ଦକ୍ଷିଣ ଆଫ୍ରିକା ଟିମ ମଧ୍ୟ ଶନିବାର କେପଟାଉନରେ ପହଞ୍ଚିସାରିଛି ।
୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ୧-୧ରେ ବରାବର ରହିଛି । ସେଞ୍ଚୁରିଅନରେ ଖେଳାଯାଇଥିବା ପ୍ରଥମ ଟେଷ୍ଟରେ ୧୧୩ ରନରେ ବିଜୟୀ ହୋଇଥିବା ଭାରତୀୟ ଟିମ, ଜୋହାନ୍ସବର୍ଗରେ ପରାସ୍ତ ହୋଇଥିଲା । ଘରୋଇ ଟିମ ବିଜୟ ସହ ସିରିଜ ବରାବର କରିଛି । ଫଳରେ ତୃତୀୟ ତଥା ସିରିଜର ନିର୍ଣ୍ଣାୟକ ଟେଷ୍ଟ ଅଧିକ ସଂଘର୍ଷପୂର୍ଣ୍ଣ ହେବ ବୋଲି ଅନୁମାନ କରାଯାଉଛି ।
ପିଠି ଯନ୍ତ୍ରଣା ପାଇଁ ଦ୍ବିତୀୟ ଟେଷ୍ଟ ଖେଳିନଥିବା କ୍ୟାପଟେନ ବିରାଟ କୋହଲି ଟିମକୁ ପ୍ରତ୍ୟାବର୍ତ୍ତନ କରିବେ । ସେହିପରି ମାଂସପେଶୀ ଜନିତ ଆହତ ସମସ୍ୟାରେ ଥିବା ଦ୍ରୁତ ବୋଲର ମହମ୍ମଦ ସିରାଜଙ୍କ ସ୍ଥାନରେ ଇଶାନ୍ତ ଶର୍ମା କିମ୍ବା ଉମେଶ ଯାଦବଙ୍କୁ ସ୍ଥାନ ମିଳିବାର ସମ୍ଭାବନା ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
