ମେଲବର୍ଣ୍ଣ: ମେଲବର୍ଣ୍ଣରେ ବିରାଟ ପାଳି । ପାକିସ୍ତାନକୁ ୪ ୱିକେଟରେ ହରାଇବା ପରେ ଷ୍ଟାଡିୟମରେ କାନ୍ଦିଲେ ବିରାଟ କୋହଲି । ସୁପର ୧୨ ପର୍ଯ୍ୟାୟ ମ୍ୟାଚରେ ଆଜି ପାରମ୍ପରିକ ପ୍ରତିଦ୍ବନ୍ଦୀ ଭାରତ ପାକିସ୍ତାନ ମୁହାଁମୁହିଁ ହୋଇଥିଲେ । ସବୁଥର ପରି ଏଥର ବି ଚୀର ପ୍ରତିଦ୍ବନ୍ଦୀଙ୍କ ମଧ୍ୟରେ ଖେଳାଯାଇଥିଲା ହାଇଭୋଲଟେଜ ମ୍ୟାଚ୍ । ଏହି ମ୍ୟାଚରେ ହିରୋ ସାଜିଥିଲେ କିଙ୍ଗ କୋହଲି । ସେ ଅସମ୍ଭବକୁ ସମ୍ଭବ କରି ଦେଖାଇଥିଲେ । ତାଙ୍କର ୮୨ ରନର ଲଢୁଆ ଇନିଂସ ବଳରେ ଟିମ ଇଣ୍ଡିଆ ଚଳିତ ଟି୨୦ ବିଶ୍ବକପରେ ବିଜୟ ଅଭିଯାନ ଆରମ୍ଭ କରିବାରେ ସଫଳ ହୋଇପାରିଛି ।
ଭାରତ ୩୧ ରନରେ ୪ଟି ୱିକେଟ ହରାଇ ସାରିଥିଲା । ଏଥିରେ ଦଳ ଉପରେ ଚାପ ପଡିଥିଲା । ମୈଦାନରେ ଆତ୍ମବିଶ୍ବାସର ସହିତ ବ୍ୟାଟିଂ ଜାରି ରଖିଥାନ୍ତି ବିରାଟ । ତାଙ୍କ ସହିତ ପାଳି ସମ୍ଭାଳି ଥିଲେ ହାର୍ଦ୍ଦିକ ପାଣ୍ଡ୍ୟା । ତଥାପି ଭାରତ ସପକ୍ଷରେ ମ୍ୟାଚ୍ ଯାଇନଥିଲା । ଭାରତକୁ ବିଜୟ ପାଇଁ ଶେଷ ଓଭରରେ ୧୬ ରନ ଆବଶ୍ୟକ ଥିଲା । ଏହା ପରେ ବିରାଟ କୋହଲି ଛକା ମାରି ପାକିସ୍ତାନଠାରୁ ମ୍ୟାଚ ଛଡାଇ ଆଣିଥିଲେ । ଡେଥ ଓଭରରେ ପାକିସ୍ତାନ ସ୍ପିନର ମହମ୍ମଦ ନୱାଜ ଦୁଇଟି ୱାଇଡ, ଗୋଟିଏ ନୋବଲ୍ ପକାଇଥିଲେ ।